رساله كانت مقفوله .. امضاء امرأه مجهوله
فتحتها والسطور مغرقاها دموع عنيها
الحبر ممزوج بدمعها فى سطورها بيرويها
مكتوب فيها متستغربش ومتحتارش فيها
انا حبيبة زمان وليك حق لو كنت تنساها
مكتبتش اسمى علشان تفتحها وتقراها
عارفه انى كنت اسيه عليك كتير اوى
عارفه انى ظلمت قلبك بالقوى
بس النهارده جيت لك علشان وحشنى كلامك اوى
معرفتش انك حنين غير بأسوة حد غيرك
معرفتش انك اتحملتنى بجد كتر خيرك
كروان .. انا عارفه انى مش من حقى اقولك كروان
بس وحشنى تغريدك فى سكتى بتاعت زمان
وحشنى كلامك اللى قولته فى اجمل مكان
وحشنى فيك معنى الانسان ... وحشتنى
============================
ادى كلام رسالتها .. الممزوج بدمعتها
وكمان باعته لى صورتها .. ياه بقى دى صورتها
فين الشعر الحرير اللى كان بيرفرف
فين ابتسامة جميله على الخدود تقف
اللون الابيض غطى الشعر الحرير
والابتسامة ماتت فى هموم كتير
========================
بقى هى دى حبيبة زمان معقوله
ولا دى فعلا واحده تانى مجهوله
معرفش اقول تانى ولا كلمه ولا قوله
هقولك ايه ما انا طرت مع غيرك
ماكنتش اعرف انه ممكن يفوق ضميرك
لو عارفك هتعودى كنت فضلت مستنى
ليا وليف غيرك بقى غصب عنى
لكن كل ما يقولى غني اقوله معرفش اغني
نسيت الاغانى بعد منك كلها
جايه ليه بعد ما العمر انتهى
شكرا على رسالتك بس ماجتش فى وقتها
سلام يا عمر عدى وذكريات بحبها ... سلام
ليست هناك تعليقات:
إرسال تعليق