قال واتكلم وغازلها
مفيش كلمه الا وقالها
وهي سامعه ايوه وحاسه وعامله قال مش على بالها
وعشان كده قرر يسكت
قال بالشكل ده حبها يسقط
وفي يوم لمحها جايه قباله
وعمل قال مش واخد باله
بس هي البنوته ديه
بتفهم اوي كده وذكيه
خبطت في كتفه وطبعا قاصده
ضحكت وقالت له ياعم ما تهدى
بص لها و ناوي كان يمشي
وطبعا وناوي انه ميتكلمشي
قالت مالك ياعم انت ساكت ليه
بطلت تكلمني طب ولا ايه
ضحكه بسخريه ولف هيمشي
وقال هو في كلام باقي متقالشي
ده انا قولت اللي محدش قاله
وقلبك عمل ولا على باله
خليني ساكت بقى افضل
قالت له استنى بلاش تزعل
استنى طيب هقول واسمعني
قالها قول ياباشا وسمعني
قالت له على فكره ياجميل
وانت مكشر دمك تقيل
مش لايق ابدا عليك زعل
ياواد يا اللي كلامك كله عسل
ضحك وقالها طب ازاي عسل
لو كلامي عسل كان اتقبل
سيبيني بقى ورايا ١٠٠ مشوار
مسكت في ايده وبإصرار
قالت له ياجدع انت كفايه هزار
هو في مشوار عندك افضل مني
ضحك وقال ابدا ابدا يامجنني
قالت له ايوه اضحك كده متكشرشي
اوعه تكشر تاني في وشي
قالها طيب ما انتي سكوتك
خلاني مضطر افوتك
ضحكت وقالت له لأ يا ظريف
مقبوله منك يا ابو دم خفيف
سكوتي انت عارفه كله خجل
والخجل على وشي زي العسل
قالت له بذمتك ايه احلى ما فيا
ضحك وقالها طبعا دي
بس الصراحه شايف بعنيا
كل ما فيكي حلو ومليون في الميه
قالت له يبقى سكوتك شئ مستحيل
و بكلامك الحلو معايا متبقاش بخيل
ولا اغني لك واقولك يعني ياواد يا تقيل
ضحك وقال فاكر انك يعني سعاد حسني
ضحكت وقالت ويعني انت يعني حسين فهمي
بص لها وقال بس انتي عندي احلى واحلى
احلى من ١٠٠ مليون سندريلا
ضحكت وقالت له ايه هو انت هتغازل تاني
قالها دي حقيقه مش كلام بس على لساني
ده انتي اللي ليكي في معاني الحلاوه معاني
انتي ال.......
ضحكت وقالت له احسن تمشي
خلاص الخجل كده ملا وشي
امشي ...
ضحك وقالها خلاص همشي
..
ومشي ..
ونادت عليه استنى بسرعه كده هتمشي
ضحك وقالها لو رجعت صدقيني مش همشي
قالت له لا ياعم انت صدقت خلاص امشي
بس اياك تنوي في مره متتكلمشي
قالها متخافيش انا مقدرشي
قالت له طيب امشي .
قالها ما انا كنت همشي
قالت له اصلي لقيت هتمشي ومتسلمشي
قالها هههههههه طيب سلام
ولا لسه في تاني كلام
ضحكت وقالت ..لا ياعم انت خلاص سلام
ليست هناك تعليقات:
إرسال تعليق