لا تبكي يا حبيب العمر
(2)
**********
(في الجزء الاول )
..........
فى الجزء الاول كان هو وهي وقصه رومانسيه ..
وراح الحرب البطل .ورجع على كرسي بعجل
ومشيت هي ورمى دبلتها جوه البحر .. وقالها وداع يا حبيب العمر .
*********
( الجزء الثاني )
بعد ما فات كام شهر
والبطل ع الكرسي وآه م الصبر
في مستشفى فى غرفه مليانه سراير
كله خرج كله مشي وهو مش قادر
تعبانه حالته النفسيه
والسبب خيانتها هي
لف بالكرسي على كل جدار
كل يوم يكتب كلمه تهون الانتظار
نفس الكلمه بقلمه الحبر
اوعه تبكي يا حبيب العمر
*****
وفاتت كمان وكمان شهور
كتب له خروج خلاص الدكتور
طلع وروح بيته ومعاه صديق
بص للحيطان وقاله في ساعة ضيق
شيل صورها يا صاحبي من كل الحيطان
وغير لي المناظر اللي اختارتها والالوان
واكتب لي على كل حيطه سطر
اوعه تبكي يا حبيب العمر
************
وبعد سنين عاشهم البطل مكسور
جيه خبط على بابه دكتور مشهور
دكتور فى اول مراحل التدريب
والبطل شعره خلاص بيشيب
قاله البطل انت مين !
قال الدكتور انا اللي متوصي عليك من سنين
البطل : متوصي مين اللي موصيك
الدكتور : هقولك ومش هخبي عليك
انا امي قالت لي اكون دكتور
كان حلمي اكون مطرب مشهور
لكن عاهدت امي وهي بتموت
اني انفذ وصيتها المليانه شروط
اول شرط اكون دكتور وده حصل
وتاني شرط اول واحد اعالجه بطل .
وانت البطل .
وتالت شرط هقولك بعدين
ياللا بقى هتقوم على رجلين
قاله البطل تفتكر هتقدر
قاله الدكتور قول يارب وهو اكبر.
البطل : لو مشيت هتقولي على السر
الدكتور شاور ع المكتوب بالحبر
وقال: حاضر هقولك يا حبيب العمر
*******
وبعد ساعات من الكفاح
تمت العمليه بنجاح
ودخل الدكتور بيضحك مبسوط
والبطل متسمر مستغرب بلا صوت
قال الدكتور مالك كده بتبص عليا
قال البطل : ضحكتك دي ملامحها مش غريبه عليا
ضحك الدكتور وقاله : ياعم البطل ده من تأثير العمليه
مبروك عليك هتخرج بعد شهر
شد حيلك بقى يا حبيب العمر
*********
وبعد ما فات الشهر طلع البطل
والدكتور لسه مكنش وصل
وراح البطل عند المينا
اللي نزل فيها من السفينه
لما فارق البنت بتاعت زمان
استغرب البطل لما لقي الدكتور في نفس المكان
قال الدكتور : كنت عارفك اصيل وهتيجي هنا
هتيجي لمكان وداع كان من كام سنه
ما هي بردوا كانت دايما بتجيبني هنا
استغرب البطل وقاله انت مين !
قاله انا ابن الست اللي رميت دبلتها من سنين
فى المكان ده هنا واسأل البحر
انا اللي وصاني عليك حبيب العمر .
ليست هناك تعليقات:
إرسال تعليق