على ايدك هنا واستنى ياقطر الحياه
-----------------------------------------
ياه .. ياه وياه و1000 مليون كلمة آه
حياه عجب العجب نعم فيها زى لا
فين زمانا بتاع زمان الناس الطيبه
فين الجيران جنب الجيران قريبه
جار بيسمع انين جيرانه ويحسهم
جار لو غابوا جيرانه يسأل عنهم
كانو ناس طيبين كانوا وكانوا
ايه الكون اتغير ولا اتغيروا سكانه ...
ايه اللى ضاع من بين ايدينا
ايه اللى غير ملامحنا وماضينا
دلوقتى كل واحد عن صديقه الغالى تاه
على ايدك هنا واستنى يا قطر الحياه
---------------------------------------------
زمان التعليم كان فعلا جميل
كانوا بيذاكروا على لمبة عويل
وبالبحراوى يعنى ضى القناديل
كانوا فعلا احلى جيل ورا جيل
كانت الدراسه عملى ونظرى
دلوقتى الدراسه بتسرق من عمرى
وتلاقى اللى قريته واتعلمته سنين
لازم تنساه فى غمضة عين
عشان تلاقى لقمة عيش
تتعلم تانى عشان تعيش
منعرفش ليه وعشان ايه وايه اتعلمناه
على ايدك هنا واستنى يا قطر الحياه
-----------------------------------------------
الله يرحم زمان ولياليه الجميله
بقي عامل زى حكايات الف ليله
فين غناوى عبدالحليم مداح القمر
ومع ام كلثوم كان يحلى السهر
وضحكة ناس زمان اللى بصوت عالى
كانوا ناس فعلا بيربوا ضنا غالى
ايه اللى غير ناس زمان عن ناسنا
ليه خلونا نكتب الجهل فى كراسنا
بقى هى دى الدنيا وده طعم الحياه
على ايدك هنا واستنى يا قطر الحياه
ليست هناك تعليقات:
إرسال تعليق