★★★★★★★
وسط ضغط العمل في الغربه
في اول رمضان من غير احبه
مضغوط وناسي فى غربته
ناسه وحبايبه وصحبته
واتسحر في اول ليله
اول مره وحده من غير عيله
ونزل الشغل وفي مكتبه
دوسيهات وورق بيرتبه
ورن تليفونه التفت وقع الصوره
على ١٠٠ حته بقيت مكسوره
قعد وفضل بحزنه يلمها
دي صورة مراته وبنته اللي بيحبها
ياه اول رمضان عنهم غايب
هو رمضان يحلى بدون لمه وحبايب !!!!
ورن تليفونه كمان مره
بص وابتسم لما شاف النمره
دي نمرة تليفون مراته
فتح وهو بيفتكر اجمل اوقاته
قالت له رمضان كريم
يارب تكون بخير وقلب سليم
قالها الله اكرم علينا
معلش الغربه سرقانه من بعضينا
قالت له خد كلم بنتك دي مبطلتش عياط
دلعتها كأنها مفيش غيرها بنات
ضحكت وضحك هو وقال حقها
دي حبيبة ابوها وحبيبة امها
قالت له بنته ايه نسيت بنتك
ولا الغربه بقيت هي حبيبتك
قالها ابدا يا حبيبة القلب
بس اكل العيش بقى صعب
قالت له ده اول رمضان انت مش هنا
اول رمضان واحنا مش مع بعضنا
قالها معلش يا عمري الصغير
قالت له بتتسحر ولا بتنسى تتسحر
ياتري بتصحى ومين بيصحيك
مين بيجيب لك ميه غيري ويسقيك
دمع وسكت والكلام مش طالع
مكالمه غاليه بس مليانه مواجع
قالت له بنته فاكر لما كنا نتسحر
ونتلم سوا على السفره وبنفطر
ولما كنت بتقولي يا عسل وسكر
تعالى بقى واوعه تتأخر
جمع حروفه وقالها مش هقدر
قالها علقتي زينة رمضان
قالت لأ ولا بلالين كمان
قالها معلقتيش الزينه ليه
قالت له ملقيتش كتفك اتشعبط عليه
سكت ومش عارف يقولها ايه !!!!
قالت له اوعه يفوت رمضان
وتقضي العيد في الغربه كمان
قالها لأ طبعا يا اجمل ورده
ده بكلامك خليتيني نفسي ارجع النهارده
قالت له رمضان كريم يا بابا يا حبيبي
قالها رمضان كريم يا رب عني ما تغيبي
وقفل خلاص التليفون
وبص للصوره بدمع العيون
وحط الصوره على مكتبه
وكلام بنته بيتكرر جواه ويتعبه
ياترى هيتحمل ويصبر ... ولا الحنين هيغلبه !!!!
ايه تعمل لو كنت مكانه ؟
ليست هناك تعليقات:
إرسال تعليق