اسفه جدا
★★★★★★★★
اسفه جدا .. انساني
مش عايزه افتح قلبي من تاني
سيبني لو صحيح كنت بتهواني
ادي اللي شوفته ف عنيها من كلام
ادي اللي قالته من غير كلام
وقالت كمان كلام مش عادي
حتى ف مرايتي بشوفك قصادي
لكن مش هسعدك وانت جنبي
خليك بعيد عن قلبي
متبقاش وليفي التاني
خليني طير وحداني
ومتبقاش وليفي التاني
ولو يهمك بجد هنايا
خليني وحدي ومتطيرش معايا
وسيبني .... سيبني الون حلمي على هوايا
ياوليفي ومش وليفي
ياربيعي اللي ضاع فى خريفي
وعيش قالت لي عيش
وليلة فرحتي متجيش
مضطره ارسم كل فرحه
مش عايزه ابين مشغوله عليك او سارحه
يعني لو شوفتك جاي هخدعك
عايزه تنساني ومش قادره امنعك
اوعه تيجي حتى لو عزموك
مش هقدر اسمع منك كلمة مبروك
ولو جيت غصب عنك اياك تغني
اوعه تغني وتعمل مبسوط ومتهني
حتى لو رسمت قدامهم انك بتضحك
انا الوحيده اللي فيهم هحسك
عارفاك من جواك بتتألم وتتقطع
وانت بترسم ضحكه وفى الشمع بتولع
اكدب عليهم كلهم واعمل سعيد
ولع شموعي بأيدك وياللا قيد
ووزع حلاوة فرحي ع المعازيم
ومع ابتسامتك متغلف الجرح الأليم
امشي بقى وكفايه مش قادره اكتم فى عيني
خليتني احس كل اللي بيبارك لي بيعزيني
امشي .... وخليك هناك خليك بعيد
عايزه اخدع قلبي واقوله انك سعيد
ياللا بقى وقبل ما تمشي تعالى سلم
بس اوعه تقول مبروك اوعه احسك بتتألم
حتى لو ضعت منك وضاع خلاص حلمك
اول ابن ليا لازم اسميه على اسمك
ومع خالص تحيات القلب اللي فاكر
بس هيفضل من غيرك وحده طاير
حرموه يسهر فى ليلك
حرموه يشرب من نيلك
بس مش هيعرفوا يعلموه ينساك
حتى لو مش هيعيش معاك .
اسفه جدا.
ليست هناك تعليقات:
إرسال تعليق