يا اللي مسافرين الساعه دي
يا اللي رايحين ناحية بلادي
اوعوا تنسوا تسلمولي
سلمولي على ابن بلدي
اللي كان ايده ف يدي
لو نسيني وقت بعدي
اوعوا تقولولي .. وسلمولي
سلمولي ع اللي سافر
اللي راح ومعدش فاكر
في غربته ياترى قادر
ابقوا اسألولي..
وسلمولي
سلمولي ع اللي كان
حبيب القلب بتاع زمان
طمنوني ان كان فرحان
وابقوا ابعتولي .. وسلمولي
سلمولي على الصحاب
اللي كانوا يدقوا الباب
ان حد منهم ساب جواب
ابقوا اقروهولي .. وسلمولي
وسلمولي ع اللي فارق
وزمان للضحكه عاشق
والسكك ام المفارق قربوها وقربولي .. وسلمولي
سلمولي ع الاراضي
وندى على غيطان بلادي
و نشيد الطير الشادي
رددوا وغنوهولي .. وسلمولي
وسلمولي ع اللي ساكن
واللي تاه وسط الاماكن
ان نسيني انا بردوا لكن
ان قابلتوه سلمولي ..
سلمولي .. سلمولي
واوعوا تنسوا تسلمولي
سلمولي على اللي غاب
واللي ذكرى حلوه ساب
واللي خباه التراب
روحوا عنده وسلمولي .
سلمولي
سلمولي ع المراكب
والشراع فوقها اللي راكب
حتى موجنا ابو المقالب
عند بحرنا صورولي .. وسلمولي
سلمولي ع المساكن
اللي فيها حبيبي ساكن
فكروه بس بمواطن
سلام خصوصي سلمولي ..
سلمولي ..
واوعوا تنسوا تسلمولي
ليست هناك تعليقات:
إرسال تعليق