لا تبكي يا حبيب العمر
( 1 )
( الجزء الاول )
**********
قصتنا جايز قصه قديمه
او اسم لفيلم سيما
مش قصدنا منها رومانسيه
يهمنا المعاني الانسانيه
بنقول فيها بأسلوب شعر
اوعه تبكي يا حبيب العمر
********
كان هو وكانت هي
وارقى معاني الرومانسيه
وبعد الموده تمت الخطوبه
بأيد وحده اتفقوا يبنوا كل طوبه
وفجأه جاله استدعا من الجيش
وراح يودعها وقالها متبكيش
قالت له مهري لو جبت النصر
وقالها اوعه تبكي يا حبيب العمر.
********
بس ابوها وخوفه على بنته
قالها انسيه وانسي انك حبيبته
روحه دلوقتي مش ملكه
اخاف يموت وعنيكي يبكوا
انسيه يا بنتي واسمعي مني
قالت لا ياابوي ده جوه ف النني
ده علمني يعني ايه حب مصر
وقالي لو موتنا او جبنا النصر
قالي اوعه تبكي يا حبيب العمر
********
وجيه البطل في اجازه
وقابل البنت الممتازه
اجازه قصيره شويه
خدها من سلاح البحريه
وقالها لكلام ابوكي اسمعي
عيشي واتهني واتمتعي
حياتي فعلا ملك الوطن
جايز متقدريش تتحملي دفع التمن
قالت روح وحارب وانا مصريه زيك
هستنى فرحتي بيك واملاها من ضيك
قالها طيب وان موتنا فدا الاوطان
اوعي تعرفي طعم يوم احزان
قالت له ١٠٠٠ بعيد الشر
هحلم برجوعك . قالها احلمي بالنصر
ومشي خطوه والتفت بأحساس كلامه المر
قبل مايقول .. قالت له عارفه اوعه تبكي يا حبيب العمر
********
والحرب قامت وانتصروا الولاد
احسن جند في افضل بلاد
وراحت هي وابوها المينا
يستقبلوا البطل اللي راجع بالسفينه
وآه من اللي حصل
بصت عليه لما وصل
بينزلوه على كرسي بعجل
وقفت بعيد متسمره وواقفه
كل الذكريات بتلف جواها ١٠٠٠ لفه
اتقدم ابوها ناحيته يواسيه بكلمه
قاله شد حيلك كله من ربنا نعمه
ورجع الأب وبنته واقفه بعيد
قالها يا للا بينا مش عايز اقول وأعيد
ده كان اهون عليكي لو عاد لك شهيد
بصت هي على البطل
ومشيت ونسيت كلامها اللي زي العسل
قال البطل في نفسه بقى هتنسي .!!!!
وناحية البحر حرك الكرسي
بصت عليه وهو بيطلع دبلتها من يده
وبسخريه قال العدو اهون من سيف حد غالي عنده
ورمى دبلتها بعزم ايديه في البحر
وبص ناحيتها وبص للبحر
وقال .. الوداع يا حبيب العمر
ده تمن رخيص اوي للي بيحب مصر ..
**********
ليست هناك تعليقات:
إرسال تعليق