رماح بني كسلان
( قصه خياليه )
...............
كان ياما كان
فى قديم الزمان
ناس اسمهم بني كسلان
لا كانوا بيحبوا الشغل ولا العمل
كانوا اكتر من ولادهم بيحبوا الكسل
عكس جيرانهم بني النشيط
كانوا في النشاط احسن سيط
وفي يوم من ذات الايام
وبني كسلان كلهم نيام
صحيوا بصوت طبله وعلى غفله
اتاري بني نشيط عنديهم حفله
وده اللي ازعج بني كسلان
وجمعهم كلهم ملكهم غفلان
وقالهم ياللا جهزوا الجيوش
دول خلوكم كويس متناموش
مش عايز بني نشيط تقوم لهم قومه
دول صحوني انا من احلى نومه
روحوا دوروا لي على قائد للحرب
يكون شجاع وسريع فى الضرب
راح العسكر يلفوا فى كل مكان
لقيوا تحت شجره قاعد انسان
وعدى على رجله اكبر تعبان
وهو ولا اتحرك ولا صرخ ولا صاح
رغم ان اسمه كان رماح
جريوا ناحيته وقالوا انت بطلنا
انت الشجاع اللي هتحقق املنا
انت اللي مخوفتش من التعبان
قالهم متهزروش ده انا كنت كسلان
كنت مرعوب وكسلان اتكلم
والحمد لله ربنا سلم
ردوا عليه وقالوا له انت مش خواف
انت قائد الجيش وشالوه ع الاكتاف
وراحوا الحرب بيمشوا بكسل
خيولهم وصلت وهم ولا واحد وصل
والاتفاق ان رماح هيشاور بالضرب
ويرفع ايده ببداية الحرب
ولما اتقابل الجيشين
تحس بني كسلان لساهم نايمين
وبني النشيط هيهاجموا خلاص
ورماح كسلان ولا في احساس
ووراه الرجاله يقولوله حرام عليك
ارفع ايدك شاور نبوس ايديك
وهو فى كسله ياعيني ياسلام
غمض عينه على فرسه ونام
هزه فارس جنبه بسيفه
ايه ياعم القائد اللي على كيفه
قال رماح متفقناش احنا على كل ده
بصوا على النشاط اللي فى جيش العدا
دول ياعم بني النشيط
مبطلوش جري و تنطيط
وانا كسلان حتى اكلمكم
ارجعوا احسن وكملوا نومكم
وهنا رمى الجيش كل السلاح
وقالوا منه لله اللي سماك رماح
ليست هناك تعليقات:
إرسال تعليق