افواه ... وارانب
..............
.
.
.
مش قصه
.
.
.
ولا حدوته
.
.
ولا قصدنا انسان او فيلم
ده احنا مجرد بنصحي الحلم
.
.
مش هنقولك كان ولا كانوا
ما اهو كل زمان له سكانه
بس بردوا كان في انسان
كان بيحافظ على قيمه زمان
كان الاب بمعنى الكلمه
وكانت الام امومه بذمه
ليه قيمنا تاهت فى العتمه
وملقيتش حتى عزاء واجب
ده انسان ده ولا ... افواه وارانب .
........
اسكت ولا اكملك .. طيب ايه هقولك
الافضل تقولي كفايه .
ولو عايز تسمع بص معايه
مش بضيع وقتك ولا وقتي
بص على الاب دلوقتي
الاب ياخساره مش فاضي
مش عارف ابنه فى سنه كام اعدادي
بقى كل معرفته بأولاده
مجرد خانه فى شهادة ميلاده
لكن الاحساس .. بقي شئ غايب
ده انسان ده ولا .. افواه وارانب
..........
قولي اسكت بقى
مش هقدر اخلى الصوره متزوقه
ومتنفعش تتزوق بالغش
لازم تتقال وش فى وش
ادي الاب مبقاش بيتابع
سلوك ابنه واخلاقه فى الشارع
مبقاش يتابعه ف. مدرسته
ولاحتى بيبص فى كراسته
ده لو كان يعني سعادة الباشا
اشترى اساسا طول السنه كراسه
ويتهموا الطفل بأنه ده جيل صايع
نسيوا ان الطفل فقد شئ ضايع
محدش بيدور على اخلاقه
بقي بيستوحي فعله واذواقه
من دش ونت وقنوات
ياحسره ع الاخلاق سلامات .
نسي الاب لابنه يصاحب
ده انسان ده ولا.. افواه وارانب
.........
قولي اسكت ياعم
مش ناقصه حرقة دم .. ايوه حرقة دم
وبص كده على دور الام
افتكرت ان دورها وبس
مجرد بس مسح وكنس
وطبيخ وغسيل وخلاص
مع السرعه تاه الاحساس
حتى اللي فاهمه مش فاضيه
بتشوف غلطهم وساكته وراضيه
اهم حاجه تراعي المناظر
حتى لو ابنها زعق للناظر
مستعده تقوم ١٠٠٠ حريقه
قبل ما تتأكد من اي حقيقه
اهم حاجه ابنها يبقى الغالب
ده انسان ده ولا ... افواه وارانب
..........
صدقني مكناش بنسود فى الصوره
جايز الاب والام دي ناس معذوره
جايز الاب من تعب الشغل
بيرجع مش قابل حتى الاكل
وجايز الام مع البيت ومتاعبه
مش فاضيه تسأل ابنها عن واجبه
ومع الجيل اللي دايما متطور
لو ملقيش ثوابت هيصبح متهور
صدقني ياصاحبي مش بقصد حد
لكن دي نصيحه بقولها بجد
ابنك بكره هو المستقبل
لو سبته النهارده بكره هتزعل
لما تلاقي كل اللي عملته بيرحل
ولو كنت بنيت طفلك كان اجمل
و علشان تحافظ على المستقبل
يبقى لازم وعليك واجب
ابني انسان ... مش مجرد افواه وارانب
ليست هناك تعليقات:
إرسال تعليق