***********
قال ايه جاي النهارده !
يحكي لي عن الموده
عجبي ما الوقت عدى
تعيش وتفتكر .!
بيقولي فاكر وفاكر وفاكر
طيب راجع الماضي وذاكر
جاي يفكرني بأوقات حنينه
مشوفتهاش ولا كنت نايم انا
يا سلام عليك يا سلام
بقى بذمتك ده كلام
جاي لقلبي تفكر
لأ ده انت كده بتهزر
بقى انت مرارك كان سكر ؟!!
تعيش وتفتكر !!
بيفكرني بلحظات عني غريبه
لسه عايز يستغل الطيبه
اما بصحيح كده نكته
ما تخلي القلوب بقى ساكته
بقى انت كنت ملاك
يا سلام عليك يا حلاك
طيب ايه لبعيد وداك
تعيش وتفتكر !!
ده بيتكلم من عقله
نسي كل قوله وعمله
اومال مين اللي ساب
ومين طول فى الغياب
ولو هنعمل كشف حساب
طيب مين اللي فات الاحباب
ومين اللي رد الباب
تعيش وتفتكر !!
بس اسكت ياعم
مش ناقصه حرقة دم
بتحط العسل فى السم
وعايزني اصدق تاني
وتقولي جاي عشاني
اتعلمت من درسك الاولاني
مرجعش أأمن لك تاني
تعيش وتفتكر !!
اقولك بقى واستنى
ياللي فاكر قربك جنه
اوعه تصدق غشك
كداب فى اصل وشك
ده انت مكنتش غير اسوه
جيت ومشيت على سهوه
ياعم اعتبرني بيت م الشعر
او واحد قابلته فى قطر
او حتى كلمه اتحذفت من سطر
تعيش وتفتكر !!!
يارب ما تفتكر .
ليست هناك تعليقات:
إرسال تعليق