بين اللي جاي واللي فات
.. بنضيع حاجات .. وكل حاجه بتبقى مجرد ذكريات ..ذكريات .. فشكرا للذكريات .
شكرا للكلمه اللي كتبناها وفرحت قلب حد حزين
شكرا للبسمه اللي رسمناها على وش اطفال لسه صغيرين
وبردوا شكرا للي قدر يسعدنا لحظه
وشكرا اوي للي سامحنا فى كل غلطه
بس كمان شكرا لكل دول لما يبقوا ذكريات ...
مجرد ذكريات .
شكرا لكل حد كان صاحبي وخسرته
شكرا يازماني لو كنت كمان غيرته
وبردوا شكرا لكل حد خسرني
وشكرا اوي للي اعتبرني شئ عادي يعني
بس كمان شكرا لكل دول لما يبقوا ذكريات
مجرد ذكريات
شكرا لكل حد مشي وخلاص اتغرب
وشكرا للي جاب لنا عن الحبايب خبر طازه متسرب
وبردوا شكرا للمحبه والحنين والموده
وشكرا اوي للي مكنش بيقف لنا ع الوحده
بس كمان شكرا لكل دول لما يبقوا ذكريات
مجرد ذكريات
شكرا للي خلاص بقي علينا ميخافش
شكرا للي اعتبرنا في حياته ع الهامش
وبردوا شكرا للي لما تبص له بيحود ويهرب
وشكرا اوي للي لسه الاصل فى طبعه متشرب
بس كمان شكرا لكل دول لما يبقوا ذكريات .
مجرد ذكريات .
شكرا للي مبينساش حبايبه مهما حصل
شكرا لخفة دم واحد صاحبنا زي العسل
وبردواشكرا لكل وش سمح غيرته طباع البشر
وشكرا اوي للي نسي ولما فكروه ولا افتكر
بس كمان شكرا لكل دول لما يبقوا ذكريات
مجرد ذكريات
شكرا للصحاب اللي عرفوا معنى الصحبه صح
شكرا للي قدم نصيحه لحد من غير جرح
وبردوا شكرا للي قبل النصيحه بكل ود
وشكرا اوي للي وسط الشوك زرعها ورد
بس كمان شكرا لكل دول لما يبقوا ذكريات .
مجرد ذكريات .
بس مش شكرا
ايوه مش شكرا
لكل حد استكتر علينا الحلم
مش شكرا للي حط فى عسل كلامه سم
ومش شكرا بجد للي شوه صورتنا في عيون الناس.
ومش شكرا خالص لاحساسي لو فقد الاخلاص
ومش شكرا لقلبي لو عشان مشاعره فكر ينداس .
ومش شكرا للدنيا اللي استكرت علينا الحلم
ومش شكرا للذكريات .. اللي متنفعش تبقى ...... ذكريات
ليست هناك تعليقات:
إرسال تعليق