شوية مناظر قصتي وصور متلونه
ناس نسيت الموده واستسلموا لكلمة انا
قفلوا بيبان الود ... خلطوا الشوك بالورد
كله بيقف ويعد ... غلطات اخوه الانسان
معقوله يا انا الذات .. تفرقي بين اخوات
وتزيدي فى الخلافات ..ومحدش يقول غلطان
كله وقت الظهور .. عايز يثبت حضور
صدقني اجمل دور ... راعي اخوك الانسان
هدي وبسرعه نفسك .. اوعه تسلم ليأسك
مش عيب الناس تحسك ... بطيبة قلب الانسان
بالذمه ايه هيفيد .. لوالدنيا جيتها وحيد
اشكر ربك وزيد .. على نعمة اخوك الانسان
اوعه تسلم لشيطانك .. يهزم جواك انسانك
اكتب على قلبك عنوانك .. لاخواتك قول بالاحضان
بالاحضان يا اخوات سكتى .. ياللي ضحكتكم ضحكتي
نفسي الاقي مهمتي .. كلمتي تسعد انسان
هنختلف شئ وارد .. لرأي الاخر مش رافض
كلنا جوانا واحد ... كلنا معنى الانسان
سيبك من كلمه تزعل .. عدي وسامح واقبل
اومال عايزين مستقبل ... من غير ما نسامح غلطان ؟
ليست هناك تعليقات:
إرسال تعليق