.
.
.
.
.
.
كان في بيت صُغير على شط نهرنا
حواليه جنينه حلوه تشبه اول عمرنا
وكان فيها بلد وبنت
وجارتهم وحده ست
وفي الجنينه شجرايه
في الضهريه تعمل ضلايه
كانوا تحتها الصغيرين
يحلموا تلف السنين
وكان حلو خطه وحلو هي رسمها
ترسم ع الطياره قلب وهو يكتب جواه اسمها
وتعلى وتطير الطياره
توصل لبيت الجاره
وكانت الست الكبيره
تشوفهم تنسى التكشيره
وتدعي لهم يكبروا
ويفضلوا مع بعض ولا يتغيروا
""""""""""
ودارت السنين تجري بسرعه
ماشيه السنين ولا ليها دعوه
وكبرت البنت الجميله وبتغني نفس الغنوه
واتقدمت ناحيته ونايم ع النجيله هو
مغمض عينيه وصاحي ومليان بالسكوت
وهي بتغني له وكأنه مش سامع صوت
هزته فتح عينيه
قالت له فيه ايه
قعد وساكت وقال مفيش والكلام باين على وشه
قالت له تقدر تغش كل الناس انا اللي متقدرش تغشه
ولا تقدرش تداري عني
ولا نسيت اني في العين والنني
قام ودارى وشه الناحيه التانيه
قالت له ايه في حياتك وحده تانيه
قالها بصراحه في
وده السر اللي انا مخبيه
قالت له مش معقوله
قالها صدقيني هي الحبيبه الاولى
وقفت فى وشه وصرخت يا خسارة صبري
مش عايزه اشوفك ولا يوم في عمري
وبتسابق دموع عينيها وهي بتجري
لف لقاها مشيت واتدارت الوشوش
وجوه شوية كلام كتير متقالوش
وبصت عليه الجاره
قالت له ليه النهايه خساره
قالها عشان متزعلش لو سمعت خبر موتي
علشان غاليه عايزها تكره صوتي
مش عايزها تفتكر لي ولا ذكرى بعدي
وبكره تنسى وتلاقي قلب قريب ف بعدي
قالت الجاره ربنا يرجعك ليها بالسلامه
ولو مرجعتش خلي طيارتنا عندك علامه
ومشي الولد اللي كان
صغير هنا من زمان .
""""""""""
وبعد كام سنه
رجعت هي هنا
لنفس المكان والجنينه
بتضحك وتخبي دمعه حزينه
لما لقت ولد وبنت صغيرين
في نفس المكان بتاع السنين
وبردوا بيطيروا الطياره
ووصلت لبيت الجاره
خافوا يروحوا عندها
وافتكرت هي اول عمرها
قالت لهم خليكم هنا
هروح اجيبها لكم انا
ودخلت بيت الجاره الكبيره
لقت طيارتهم اللي فات عليها سنين كتيره
يدوب باين منها حروف من اسمها
وباهته قوي رسمت قلبها
وبصت في قلب المكان
لقيت زهور اشكال والوان
وف وسط الزهور صوره كبيره لمحتها
جريت بسرعه ناحيتها
وقبل منها قلبها جري
لقيت صورة حبيبها لابس عسكري
وقلبت فى الصوره لقيت كتابه فى ضهرها
شهيد بيحب مصر وحياته مهرها
صرخت وقالت آه يسمعها اللي اخر الدنيا
قربت منها الجاره وقالت هي دي الوحده التانيه
خبى عنك عشان ميتعبكيش
علشان لو مات شهيد متدمعيش
ووصاني اقولك لما ترجعي
اوعي تضعفي ابدا ولا تدمعي
خليك قويه .. عشان انتي بنت مصريه
وبيقولك كان حلمه يبني لك قصر
بس اعذريه اصله كان بيحب مصر
ليست هناك تعليقات:
إرسال تعليق