ودُق ياجرس المدرسه
........ . ...............
على باب الفصل ده اكتبوا اسامينا
كنا هنا زمان .. بس كبرنا ومشينا
وجات اجيال كتير اوي بعدينا
..
سيبوني ارجع بالذكرى حتى يوم
ياريت تعذروني ومحدش يلوم
في الفصل ده كنا زمان يازماني
كان احلى فصل بجد تانيه تاني
ياريتني كنت مليته بالاماني
بس وقتها مكنتش بحب الشعر والاغاني
بس كنت بحب فصلنا
ايوه كنت بحب فصلنا
كنا كتار بردوا .. بس كان بيلمنا
كان الاستاذ قيمه وقامه
كانت اخلاقه علم وعلامه
وكان شرحه مبسط وكمان مفهوم
كانت الانشطه اللي دلوقتي علوم
كانت الابره من احترامه ترن
تحس الناموسه تخاف ما تزن
مفيش ولا همسه غير صوت شرحه
وكل المدرسين كانوا كده شرحه
كان الفصل نظيف ياسلام
وكانت ايام اجمل ايام
كنا في اخر الاسبوع
بعد اخر حصه وموضوع
نغسل السبوره بالميه والسكر
رغم سوادها بتحلو اكتر
وكانت الفسحه اكتر من ساعه
كنا نقصيها لعب بكل براعه
كنا نلعب طبعا كوره
ونسمي نفسنا بلعيبه مشهوره
بس في حاجه حلوه كانت في الملعب
كله بيلعب مهما انفعل بردوا مؤدب
وطبعا ملعبنا كان شارع المدرسه
وكان فينا حاجات حلوه كويسه
كنا بنقف لو فات حد
صغير كان او حتى جد
حتى لو لعبنا في الساعه ربع ساعه
علمونا نكون اجيال مش طماعه
ولما بيدق جرس الفسحه ندخل تاني
بجد لسه لحد دلوقتي فاكر مكاني
كان في احلى فصل تانيه تاني
ياترى يا مدرستنا لسه فاكراني .
بجد يا مدرستي وحشتيني
دقي بقى جرسك فكريني
كانت هنا فيكي .. اجمل سنيني
ليست هناك تعليقات:
إرسال تعليق