مين اللي قال !!
.....................
جايز اكون مش لونك .
وجايز انت بردوا مش لوني
وجايز اللي بيعجب عيونك
متقفش قصاده عيوني .
ايوه جايز .. وايوه عادي .. نختلف فى حاجات كتير
في الاسامي .. والوشوش .. والبدايات .. وجايز ف المصير.
بس كل ديه حاجات عاديه
المهم نتفق ف الانسانيه
اصل دي الحاجه الوحيده اللي مفهاش اختلاف
كلنا انسان . مهما كان الاسم والاوصاف
ولا اسمك ولا لونك ولا شكلك
كله صفر جنب اخلاقك وفعلك
يعني كيف تقدر تعادي
ازاي متسامحش ويبقى عادي
ليه لما حد يسعدك بتنسى كأنه مشهد
ولو غلط مره فيك حتى من غير ما يقصد
ليه الفرحه بتتلاشى والغلطه كالنقش ع المعبد
دلوقتي بس عرفت قيمة استيكة القلم الرصاص
انها بتمحي كل الغلط ولا بيبان له اساس
انما احنا .. ايوه احنا
من كل غلطه عملنا محنه
.
ليه بطلنا نعتذر .. ولا مش واثقين حد يسامحنا
مين اللي قال بس ان اللي بيسامح ضعيف
اومال مين بقى اللي له قلب ونظيف
لما اللي بيسامح ضعيف
يبقى مين اللي قوي ياعالم كفيف .
اصل الشوف مش مجرد عيون بتبص
ده الشوف قلوب من غير كلام بتحس
واللي يحس فى زمانا ده يستاهل سلام وتحيه
اصل ده اللي تلاقي معاه معنى الانسانيه .
ليست هناك تعليقات:
إرسال تعليق