لأ ... مش بحبك
.................
اصلي مبعرفش يعني ايه كلمة بحبك
كل الحكايه اني بتمنى الفرحه لقلبك
واني بتمنى الخير ليكي ولحبايبك
تفرق ايه فى ابتسامتك مين بعيد ولا جنبك
متهمنيش غير ابتسامتك تبقى واضحه
متهمنيش غير ان اشوفك دايما بفرحه
واقولك ايه! .. معرفش ده يبقى اسمه ايه ؟
.
.
.
لأ .. مش بحبك
.
اصل اللي عندي احساس اول مره اعرفه
ده حتى كلام الحب معرفش يوصفه
كل الحكايه اني بتمنى الزهور تملا دنيتك
واني اتمنى اشيل كل شوكه من سكتك
واني اكره اللحظه اللي فيها حد يلمح دمعتك
واني نفسي اسبق الدمعه قبل ما تحاول تسيل
واجري امسحها بأيدي وتكون احن من المناديل
واقولك ايه ! .. معرفش ده يبقى اسمه ايه ؟
.
.
.
لأ .. مش بحبك
بس بتمنالك السعاده اللي لسه معرفهاش انسان
سعاده سكر زياده فى كل زمان ومكان .
سعاده جميله جدا تسر القلب
لو هو ده اللي بيقوله انه اسمه حب ... يبقى انا لسه مش بحبك
ليست هناك تعليقات:
إرسال تعليق