مرايه خرسه
..........
مرايه خرسه ياللا قولي وانطقي
هبص لك قوي ياللا فى ملامحي دققي
لو تقدري احكي لي ووضحي
ما طول عمرك في ملامحي بتبصي وتشرحي
كملي جميلك وحسي باللي فينا
ولا انتي بس مجرد بتصوري ملامح فرحانه وحزينه
ولا احنا بننسى فى النهايه انك مرايه
متقدريش تشوفي اللي جوايا
اصله اخرك مرايه .. لكن
مرايه خرسه
ياترى تقدري تحكي وتبقى صريحه
ولا دورك بس مجرد مرايه ف تسريحه
مجرد حاجه تفكرنا بملامحنا ومناظر وشنا
وبنكرهها اوي لو مره معرفتش تغشنا
قال يعني قال هتجيب لنا وش تاني غير وشنا .!!
عجبي
عجبي علينا رغم صراحة مرايتنا
بنرجع نبص فيها مهما قالت غلطتنا
لكن شايفين مشكلتها الكبيره بس
انها بتوصف ملامح لكن اللي جوه ولا بتحس
وبننسى انها مهما شافت هي في النهايه
يدوب مرايه
مش ممكن تحس اللي جوايه
لانها بس يدوب مرايه ... لكن
مرايه خرسه
ودلوقتي بص بقى وفكر معايا
كل ما تحب تشوف نفسك تبص للمرايه !!
رغم انها ولا بتتكلم ولا بتتناقش ولا بتقول حتى اخبارك
دي يدوب بس بتديك لقطه سريعه بتاخدها بأنظارك
رغم انها مرايه وخرسه
لسه بترجع لها تاني لسه
لا ياصديقي مرايتك مش ديه
مرايتك أخ بيتعامل بعقل وحنيه
مرايتك اخوك
يمكن مش ابن امك وابوك
بس اخوك .
لانه هيحس باللي بينا قبل ما نحكي
يشاركني همومي ويفرح لضحكي
ام مرايتي الخرسه مش هتهون عليا مهما هشكي .
وان كنا بنتحمل مرايتنا الخرسه ونرجع ليها
لازم تبقى مرايتنا الحقيقيه اخ بينصح وملوش مصلحه فيها
غير انه بس في كل الحكايه .
انه اخ وصاحب يعني مرايه .
لكن .
مش مرايه خرسه
ليست هناك تعليقات:
إرسال تعليق