لغز الرساله المجهوله !
........ ...................
كانوا ٤ اصحاب
كانوا .. كانوا احلى شباب
دكتور شاطر ومهندس ممتاز
ولاعب كوره وكمان استاذ
ومغنواتي سارح الليالي
يغني ف الفضا الخالي
وكانت هي ف نفس البلده
كانوا بستان وهي اجمل ورده
هم الاربعه كانوا بيحبوها
وقصتها عن بعض ياناس خبوها
ولا واحد يوم حكى للتاني
ولا حد حاسس ولا باينه معاني
كل واحد قال كان فاكرها
ان التلاته بيحبوا غيرها
كل واحد كان بيبص عليها
ولا واحد منهم حكى ليها
وهي محتاره ومشغوله
مش قادره تعرف بسهوله
مين فيهم اكتر م التاني
قلبها مش راسي على مواني
ياترى الدكتور بيحب اكتر
ولا المهندس الاشطر
ولا استاذ زي السكر
ولا اللعيب هو الاخطر
واهي تايها ومحتاره في ليلها
وجيه المغني يغنيلها
قالت له اسكت متغنيش
اتملا قلبي وميكفيش
ابعد دي عيوني مدمعه
محتار قلبي وسط اربعه
ومشي المغني وساب البلده
وتعبت ودبلت اجمل ورده
وفى المستشفى الاربع اصحاب
بالورد داخلين سوا م الباب
من غير معاد ولا مقصوده
دخلوا الاربعه نفس الاوضه
استغربوا لما شافوها
واكتشفوا ان كلهم بيحبوها
مشيوا وراحوا وفارقوها
وكل واحد فيهم محتار
يعمل ايه والعقل طار
دخل كل واحد مكتبه قدامه
وصورتها وورقه واقلامه
وهي في المستشفى على سريرها
وصلتها رساله تعبت تفكيرها
والرساله كلامها مش معقول
بص الرساله ايه بتقول
انا اللي سماعة قلبي وكمان النبض
بيقولوا اسمك ونسيت العد
انا اللي حبي مش منظره
انا حبي بالقلم والمسطره
وانا اللي هبني لك قلبي مساكن مخصوص
وهعملك جناين ع الجنبين وياسمين مرصوص
وهتبقي هدفي وقدامي
احلى جون وسط احلامي
بس الرساله ف ختامها
مفهاش ذكر لأي اسامي
فضلت تفكر وتفكر
والتفكير يتعب اكتر
.. لو كنت فاكر انك اشطر
بص وشوف كل قواله
ومين اللي بعت لها رساله ؟
ليست هناك تعليقات:
إرسال تعليق