حسن ونعيمه
٠٠٠٠٠٠٠٠٠٠٠٠٠٠٠٠٠
آه ياليل آه على الايام الحلوه اللي مبتدمشي
وآه على ناس حلوه بتروح مترجعشي
وأدي حكايه بحكيها بكلماتي
حكاية جدع اسمه حسن ومغنواتي
كان بيلف يغني للليل والسهر
كان يلف وحيد لحد ما صادف ليله قمر
كان اسمها نعيمه وكان هو حسن
في قصة عشق وروايه بيحكيها الزمن
كانت نعيمه بنوته في قريتها
وكان حسن يلف يتغنى بضحكتها
وراح حسن يطلب ايديها
بس ابوها رفض يزوجه ليها
قاله انت مغنواتي متنفعش نسيبي
وهي في حجرتها تنوح وتقول حبيبي
اصل ابوها كان بيحلم لها بعيشه حلوه
كان عايز يزوجها لابن البلد عطوه
ومرضيش حسن هروبها معاه
قالها سمعتك اهم من كل الحياه
وخد كلمه من عمدة بلدها تكون نصيبه
والعمده وعده يقف معاه ولا يسيبه
ورجع حسن لبلده يزف التهاني
وابو نعيمه لسه على رأيه الاولاني
بس العمده ساعد في الحكايه
حاول يتمم اجمل روايه
واقنع ابوها يوافق عليه
ومقدرش ساعتها ابوها يقوله ليه
وفي السكه حسن جاي والطبله بتدق
وقلبي نعيمه بيرقص على نغمة دقاته يدق
وعطوه حرض اهل بلده ع الولد
وحسن جاي لوحده من غير اهل البلد
طلع عطوه يجري ببندقيته وياه
ونعيمه طلعت من فرحتها تتلقاه
وحسن ع الكرته وقف لما لمحها
نزل حسن ونعيمه بدموع فرحها
وصوت رصاصه بيرشق في قلب الولد
وحوالين حسن نعيمه واهل البلد
وقبل ما يقع ع الارض نعيمه مسكت حسن
قالها اموت احبك .. قالت له ان موتنا قصتنا هتفضل طول الزمن
ومات المغنواتي اللي دنيته كانت سهر
وساب قصته روايه يحكيها الليل للقمر
ليست هناك تعليقات:
إرسال تعليق