.........
نتوجد .... نتولد
نعيش الطفوله احلى م السكر
ونكبر ..... نحب ونعيش ونفارق ونعذر ولانتغير
ونمشي السكه ف اولها
وجايز منقدرشي نكملها
وعلى سكه غيرها بندور
وننسى .. وتاخدنا سكك خطاوينا
على سكه تانيه ومشينا
ولو صادفنا الرجوع ليها
نلاقيها .. نلاقي فيها ... لسه احلى مافيها
حاجات متغيرهاش السنين ومهما جات متلونه
لسه فينا حنين لنفس الامكنه.
وياسلام
ياسلام ياسكه وكنا فيكي
لو عدنا صدفه تاني نمشيكي
بعد ما فكرنا بعدنا ونسينا خطاويكي
بس من اول ما هليتي علينا من بعيد
كل شئ فينا صحي زي مولود من جديد
ريحة ترابك لسه بنشم فيه ريحة زمان
رغم انهم غيروا فيكي كل اللي كان
واللي سافر واللي فارق واللي مبقاش بتاع زمان
واللي رحل وبقينا نقول بس انه كان
كل دي حاجات وجودها دلوقتي مش ممكنه
بس اللي فيكي لسه عايش حنينا لنفس الامكنه
وياللا سلام
سلام بقى يا سكتي ياعمري اللي عدي
سلام بقى مضطر اكمل سكتي بتاعت النهارده
وان كان عليا على عيني البعد عنك
ده انتي حنينك حسسني اني حته منك
بس السنين لفت وخدتني منك غصب عنك
وانا غصب عني خطوتي متمشيش عليكي
بس مكنتش اتصور انه بعد عمري لسه باقي حنيني ليكي
اوعي يموت فيكي
اوعي يموت فيكي الحنين مهما فارقنا دروبك
خلي الحنين اصيل فيكي مهما غيروا توبك
خلينا لما نرجع نشم فيكي رحيق الزمن اللي سافر
وان بعدنا ولاتوهنا ولامشينا ولاروحنا خلي الحنين فاكر
وخلينا واحنا بعيد تفضل قلوبنا مطمنه
انه لسه باقي فيكي حنين الامكنه .
ليست هناك تعليقات:
إرسال تعليق