.
.
.
موسيقى في الحي الراقي
٠٠٠٠٠٠٠٠٠٠٠٠٠٠
بكل اونطه ف غنوه هابطه
على شوية تنطيط
قسمها يا اسطى دي باينها ورطه
وهتتباع ف شريط
مع الاسف ادي حال المغنى
بأمانه وجعتولنا دماغنا
ياخسارة ثقافتنا الراقيه
بالاذواق دارت زي ساقيه
مبقاش في فلتر لمعاني
اي كلام بقى اسمه اغاني
نفس اللحن بردك عادي
اهم حاجه الصوت مش هادي
ولا سلم مزيكا نفكر فيه
ياترى كام حد بيفهم دو ري مي
فين راحت تعاليم اخلاقي
وسط موسيقى الحي الراقي
ولا مغنى ولا عاد تقسيم
فينها الست وفينه حليم
دلوقتي الاحبال الصوتيه
تنفع تشد احسن عربيه
لامؤاخذه يافرسان المغنى
فيه كلام صدع ف دماغنا
وادي الطفل اتعمى تقليد
بيرقص بالمطوه ووالده سعيد
بكره هيكبر ولا هيفيد
ومش راح تقدر يوم تحاديه
من غير ما تفلتر اغانيه
قولي ياعم ياخال وياجد
ايه معنى الحريه بجد
فين راحت تعليم اخلاقي
وسط موسيقى الحي الراقي
سوق المغنى بقي ببلاش
والكلمه الحلوه غاليه متلقاش
فين هاني شاكر وايهاب
فين فؤاد فين عمرو دياب
فين جورج وانغام واصاله
ليه مبقيتش ف كلمتنا اصاله
عيني ياعيني ع الالحان
زمن السميعه مبقاش له ودان
فين راحت تعاليم اخلاقي
وسط موسيقى الحي الراقي
شكرا للي بكلمه ومعنى
اثروا فينا بأجمل مغنى
وياخساره ويامليون أسف
على موت الاسلوب الهادف
الله يرحم اجمل خال
الابنودي واجمل موال
واللي لسه على نفس الحال
لسه بكلمه بيبني ف اطفال
وانت ياعم قوم واصحالي
اوعه تقولي طب وانا مالي
اطفالك دي او اطفالي
محتاجه منك فلتر للغنوه
وقعدة أب ياعمنا حلوه
خلي موبايلك سايلنت شويه
واقعد ساعه كل عشيه
ولاكمبيوتر ولا دش واغنيه
اسمع منهم واتكلم
ارجع تاني بدورك علم
واسأل نفسك بس ثواني
بقى دي هي احلى اغاني
فين راحت تعاليم اخلاقي
وسط موسيقى شارعنا الراقي
ليست هناك تعليقات:
إرسال تعليق