.
.
لغز الرساله المجهوله ( ٢ )
....................................
.
بنت ومغني واصحاب اربعه
والبنت ف المستشفى وعيونها مدمعه
بتقرا فيها وتفسر معانيها
ياترى مين اللي بعتها ليها
المهندس ولا الدكتور
يكونش الاستاذ .. ولا اللعيب المشهور
وفضل عقلها يلف ويدور
وهنا دخل اللعيب يتسحب
بيبص ويتلفت كأنه متكهرب
اول ما شافته طلعت الرساله
وقالت له مين فيكم بقى صاحب المقاله
بص فيها اللعيب
وكأنه شاف شئ عجيب
قالها انا جاي اطمن عليكي
انا اساسا مش بفكر فيكي
والاسلوب ده ابو دم شرباته
اسلوب حد من اصحابي التلاته
قالت له مين .. قال معرفشي
زي ما انتي شايفه الاسم ممكتبشي
وسلام بقى عشان مضطر امشي .
ومشي اللعيب المشهور
وبعد شويه دخل الدكتور
بص وراه شاف حد متابعه
واتكلم بالراحه ومحدش سامع
قالها اخبارك جاي اطمن
قالت عندي سؤال تجاوب لو ممكن
وطلعت الرساله وقالت له شوف
وكأنه غريبه عليه الحروف
قالها الاسلوب ده ابو دم شرباته
اسلوب حد من اصحابي التلاته
قالت له مين ... قال معرفشي
وزي ما انتي شايفه الاسم ممكتبشي
وسلام بقى عشان مضطر امشي
ومشي الدكتور ولانفاسه بيحبس
وبعد شويه دخل المهندس
بيتسحب ويبص وراه
خايف عيون تكون شايفاه
قالت له اهلا ياهندسه
رساله بجد كويسه
وطلعت الرساله واديتهاله
قالت له الكلام ده مين قاله ؟
قالها انا جاي اطمن عليكي
انا اساسا مش بفكر فيكي
والاسلوب ده ابو دم شرباته
اسلوب حد من اصحابي التلاته
قالت له مين .. قال معرفشي
وزي ما انتي شايفه الاسم ممكتبشي
وسلام بقى عشان مضطر امشي
ومشي المهندس الممتاز
وزي التلميذ الهربان دخل الاستاذ
قالت له اهلا باللي بيفهم ف الكلمه
يعرف يكتب وكلامه حكمه
وطلعت الرساله وقالت له قول
مين كتب الكلام الحلو المعسول
قالها انا مدرس علوم
انا افهم ف الفم والبلعوم
لكن نظم القصايد مليش فيه
واكتبه اساسا لعيونك ليه
ضحكت وقالت له استنى هقولك
عارفه الباقي وهكملك
وقالت له الاسلوب ابو دم شرباته
اسلوب حد من اصحابك التلاته
قالها الاستاذ برافو عليكي
هو اكيد حد فيهم بيفكر فيكي
طيب مين ... قالها معرفشي .
وزي ما انتي شايفه الاسم ممكتبشي
وسلام بقى عشان مضطر امشي .
وخرج الاستاذ ودموعها مغرقه النني
وهنا بهدوء دخل المغني
قالت له مفيش غيرك اللي هيقولي مين
مين بعت الرساله بكلماتها الحلوين .
بص المغني ف الرساله وقالها .
بس مع الاسف كلام الفقره انتهى
فكر بقى انتى في المقاله .
وقولنا بقى من بعت الرساله ؟!
