من قلبك

مهما تعاني من القلق
قول يارب
مهما توصل للحظة زهق
قول يارب
اياك تقول قلبي اتخنق
ده ربك كبير مهما رزق
واياك تخاف من بكره لا .. ده رزقك عشانك اتخلق

اركن بقى الاحزان ف جنب
وقول ياااااااااااااا يارب

احلم ببكره بشمس جايبه لك شعاع
اوعه تقول مش جايه مهما قالت لك وداع
ومهما طال الليل حافظ على حلمك م الضياع
واوعه تنسى الشمس جايه ليك وليا بأجمل شعاع
خد من شعاعها امل واعمل لأملك حق انتفاع
مهما شوفت الناس بلا احساس وب١٠٠ مليون قناع

بكره ليك بأديك هتبني تبت فى حلمك قبل الضياع

وارسم لحلمك مركبه .. واعمل لمركبك من املك شراع

اوعه تخنق قلبك الطيب بجرح لأ.. خلي قلبك بالافراح يساع

دي الفرحه حلوه لما تلمس سلوك القلب
ارفع ايديك للسما ومن قلب قلب القلب
قول ..... قول يااااااااارب

كلنا على الكراسي

كلنا على الكراسي
.
.
.
.
ياللا مع الطفل الراسي
هنلعب سوا بالكراسي
طالما احنا بروح فريق
عمر المساحات ما تضيق
صديق جنبه صديق
وكلنا على الكراسي

وسع ياللا لزميلك
بالود المكان يشيلك
وسع خليه يجيلك
شيلوا بعض ع الكراسي

شده جنبك يا صاحبي
وقوله تعالى جنبي
شارك ويايا لعبي
فى لعبة الكراسي

واللي هيطلع كسبان
اللي يشيلهم مكان
يتعانوا بود كمان
يقعدوا على الكراسي

الانسه حنفي

.
.
.
الانسه حنفي
.........
مع اعتذاري ومع اسفي
لفيلم فيه الانسه حنفي

حلوه يا سمعه وملعوبه
ياابو ضحكه تجنن محبوبه

وسمعه عامل دور الست

وكأنه اجمل واحسن بنت

ومشهد بضحك متواصل

لما الشاويش عطيه بيغازل

تصور بقى انت وعيش لحظه

مشهد غزل جيه بالغلطه

عطيه بعد افلامه فى الجيش

بعد ماكان عامل على سمعه شاويش

دلوقتي ياساده يا مستمعين

 عطيه بيغازل اسماعيل

وقال ليه بيقولها فيفي

ده مخطرش حتى ف تأليفي

ياه ع الغزل مع اسفي
لفيلم اسمه الانسه حنفي

زي اول عمرنا

.
.
.
.
وحشانا ياملامح وشنا

يا اللي فارقتينا فى اول عمرنا

لما كنا زمان لسه بطيبة قلبنا

وناس بقيوا هناك وكانوا هنا
ووشوش وغابت عننا

وانت وانا

وسلام مربع للجدعان ..
والانسان .... الانسان

اللي لسه زي زمان
اللي بيدي لغيره امان
اللي مهما مر زمان
لسه جواه الانسان
اصيل ملامحه حنينه
زي اول عمرنا

ايوه احنا بشر دنيا وعالم

بتجمعنا ملامح بني ادم

فينا وشوش النسمه تجرحها

وفينا وشوش متبانش افراحها

وفينا وشوش ...وشوش كتيره زي بعض  ملامحها

 وفي وشوش حنينه
واسامي تشبه بعضنا
وانت وانا
وسلام مربع للجدعان..
والانسان ..... الانسان
اللي لسه زي زمان
اللي بيدي لغيره امان
اللي مهما مر زمان
لسه جواه الانسان
اصيل ملامحه حنينه
زي اول عمرنا

يو .. مي ...... فاصوليا

                   يو .. مي ........ فاصوليا
               
                 ........   ........  .......   ........


.
.

.
كان في المطعم ويا اصحابه

ولمحها بتدخل هي من بابه

ودخلت .. قعدت ع الطربيزه

صاحبة نفس رقيقه عزيزه

يا سلام بس هيوصف ايه
دي في وشها ييجي مليون ميزه

كل اصحابه طلبوا طعام

وعمنا ده غرقان احلام

سمعها بتطلب اكل فاصوليا

راح طالب زييها فاصوليا

كل اصحابه عادي بياكلوا

وعمنا بقى ايه واخد عقله

بيبص عليها حلوه بشكل

وبيحط الملح بره الاكل

واصحابه يقولوا سلامة الشوف

قام عمنا ساكت مكسوف

راح يغسل ايده طب ليه

حتى اصحابه ضحكوا عليه

ده يدوب بس حط الملح

وياريت حطه فى طبقه الصح

بص على الطربيزه الفاضيه

مشيت من غير حس وهاديه

قالوا له اصحابه انت مأكلتش

قالهم معلش اصلي مجوعتش

ومشي عمنا ولا حدش حس

جواه لخبطه بين صرخه وهمس

ولفي يا ايام .... ودوري يا ايام

وكل يوم عمنا فى ميعاده تمام

بيروح المطعم نفس المطعم

بيطلب ولا بياكل ولا يستطعم

بيفضل يبص على الطربيزه اياها

بس هي منين يلقاها


ويطلب برضو تاني فاصوليا

بقيت عنده الاكله الغاليه

لكن طبعا ولا بيدوق
وبيفضل سرحان ولما يفوق

يغسل ايده عادي ويمشي

رغم انه ياعالم مأكلشي

وبعد سنين قدره بيجمعهم

ومع بعض الدنيا تمتعهم

وبقيت هي خطيبته الحلوه

وفي اول مره بتعزمه على غدوه

وهو وهي على سفره طويله

مشوار بينهم ولا الف ليله

قالها بصي بقى يعني من الاخر

ولا اعرف رومانسيه ولا حتى مذاكر

بس اللي اعرفه يعني

محبش غيرك يسمعني

يا نخلي الكراسي جنب بعض

يا نخلي الطربيزه تكون بالعرض


قامت وقالت له صدقت بجد

حتى عشان نبقى فى وش بعض

وعدلوا الطربيزه بقيت بالعرض

 بص لقي حبيبته الغاليه

جابت له الاكل فاصوليا

ضحك ... عمنا ضحكته عاليه !!!!


قالت له مالك بتضحك ليه !

قالها ابدا وسمى ومد ايديه

بيأكلها بأيده قالت له كفايه

جاي تأكلني ولا تاكل معايا

قالها كلي انت وهحس بالشبع

وهنا شعاع احساسه في عنيها لمع

مدت ايدها تأكله هي

قالها شبعت من كتر حلاوتك ديه

وقام عمنا يغسل فى ايديه

ضحكت .. قالها بتضحكي ليه!

قالت له عجبي وعجبني  هقولك ايه

واحد مأكلش وهيغسل ايديه !!

ضحكها وقالها معلش يا غاليه

انا اساسا مش باكل فاصوليا

بس لقيتك في المطعم طلبتيها

قولت يبقى اكيد بتحبيها

حبيتها عشانك وحبيت اشوفك بتاكليها

حتى لو مش هاكلها وتبقى عاديه

حبيت اني أحسك بتاكليها بأديه

....
وقفت هي. حلوه بصمت

قالها كملي لحد ما احس اني شبعت

ضحك .... وضحكت .... وقالت له هو انا غاليه ؟

ضحك وقالها ابقى اسألي الفاصوليا . 

عيش اللقطه

الحياه
ياه ..... مش بذمتك كانت حلوه الحياه

ياه .... مش كان عندك نفس اللقطه

مش كانت على وشك نفس البسطه

مش كانت ايديك صغيره بس بتفردها لأبعد حدود

شوف دلوقتي اتمنيت تكبر .. وايديك كبرت لكن بقيود

ياه على لقطه في عمرك كانت اتمنيتها تعدي وبتتمناها تعود

بص كده في الصوره شويه

مش كانت عندك لقطه زي ديه

مش كانت عندك نفس الحريه

استعجلت سنين الحلم الطارح

وكل ماييجي بكره تقول الاحلى امبارح

ليه اليوم واحنا عايشينه بيبقى اساوه

ليه بيحلي بعد مايمشي طيب منين جاته حلاوه

ولا يكونش اللي بيفوت على خير بيبقى تمام

هو ده بس مجرد حكمنا السطحي على الايام

ياسلام .......... ولا اقولك سيبك من اي كلام

بص على الصوره وخد نفسك لسنين فاتت وقوام

وارجع عيشه اللقطه الغاليه .. تمنها غالي متسألش بكام

عيش اللقطه ..... عيشها تمام

كفايه اوي

                           كفايه اوي
                           ........ .......


                      كتر خيرك اوي
                      كسرت القلب القوي
                      ياخسارة القلب السوي
                      اخلص اوي عشق وهوي
.
                  كفايه .... كفايه .... كفايه اوي

                            كفايه اوي
                           ..................

القلب الكبير اتملا اوجاع

جواه اوجاع اشكال وانواع

خلاص بقى خلاص بقى
قلبي الكبير مبقاش بيساع

خلصت بقى وخلاص خلصنا

مش هنغلي رخيص رخصنا

كفايه .... كفايه .... كفايه اوي

القلب الكبير خلاص اتقفل

ياما حب ولا اتقبل

هو انت ايه انت ايه
شكرا خلاص واجبك وصل

خلصت بقى وخلاص خلصنا

مش هنغلي رخيص رخصنا

كفايه .... كفايه .... كفايه اوي

القلب الكبير مبقاش يتأثر

ازاي يحس وهو مدمر

شكرا كتير شكرا كتير
قلبي الطيب بص اتغير

خلصت بقى وخلاص خلصنا
مش هنغلي رخيص رخصنا

كفايه .... كفايه .... كفايه اوي


          كفايه اوي

لو سمحت

اسكت
.
بلاش
.
قصص الحب خلصت خلاص


لو سمحت

متقربش مني اكتر من كده لو سمحت
ده انا مشيت ورا قلبي انجرحت
ومشيت ورا عقلي انجرحت

لو سمحت

كفايه عليا اوي جرحين
كفايه عليا الحب مرتين
مخدتش منه غير جراحه ودمع عين

حاولت اطلع بيه لفوق لقيته مننزلني تحت

مشيت ورا قلبي انجرحت
ومشيت ورا عقلي انجرحت

متقربش مني اكتر من كده لو سمحت.

لو سمحت

متقربش مني وخليك بعيد

مش هقدر احب خالص من جديد

بطلت اصدق كلمة حب
مش هظلمك وملكش ذنب

متقربش مني ده جوايا نار بلاش تقيد

اوعه يغرك ملامحي الطيبه

قلبي وعقلي خلوني مستغربه

مشيت ورا قلبي انجرحت

مشيت ورا عقلي انجرحت

متقربش مني اكتر من كده لو سمحت .

لو سمحت

متزعلش مني وسيبني وحيده

سكك الحب عايزاه تفضل بعيده

اصل قلبي جرحني مره

وحبيت بعقلي جراحه مُره

كفايه بقى هرضى بنصيبي

واعتبر مشاعري هي عيبي

لو كان في مكان للحب كنت اخترتك حبيبي

لكن مبقاش من حبي
حاجه في عقلي ولا قلبي

مشيت ورا قلبي انجرحت

مشيت ورا عقلي انجرحت

متقربش مني اكتر من كده لو سمحت .

لو سمحت .... لو سمحت

شهاب .. و لكن !

على فكره
ههههههه مقصوده
............

...... ........
جايز شهاب ميكونش كداب

بص معانا وشوف الاسباب

كان يدوب عنده كام عام

وبيطلع يرعى فى الاغنام

وابوه بيوصي ولاعلى باله

وصيه وحده وبيقولهاله

ياخد باله من الديب لو جاله

وبصوا ياعيني ع الطفل شهاب

ميعرفش شكل ومعنى ذئاب

فضل يرسم قصه و يتصور

وحب يكمل جواه المنظر

وزعق قوي وبعلو الصوت

الحقوني انا قربت اموت

وتصور عقله الصافي النونو

اتصور الفيلم واقع بعيونه

ولما جات الناس علشانه

من كتر ضحكه وقع في مكانه

وتاني مره نفس زي العاده

يضحك ع الناس ويحس سعاده

وفي تالت مره جاله الديب

ونادى ع الناس ولاحد يجيب

وطلع ع الشجره والخواف جواه

كان خايف من الديب قبل ما يلقاه

مين اللي بالخوف والكدب اللي ملاه

هو خوفه فعلا من الذئاب

ولا الكدب طبع شهاب

ولا اساسا كل اللي حصله

كان مجرد تصور عقله

يعني شهاب .. ممكن ميكونش كداب .!!!!

.
( مأخوذه عن قصة اغنية شهاب الكذاب ).

خطوط عمرنا

خطوط عمرنا

............

وسط القدر مكتوب لنا خطوط عمرنا

نعيش ونكبر يتولد لنا حلمنا

اوعه عتمة ليل طويل تنسيك نهار بالضي جي

متخليش حلمك يموت وانت كائن اصله حي

اوعه ان طالت غيبة النهار

يضيع يقين الامل م الانتظار

اوعه يهزك خريف .. ولا حر صيف .. ولا حتى برد في ليل شتا
خلي حلمك زي الربيع .. شجره بديع .. مش اوراق متفتفته

دي السنين لما بتجري مش صالحك  مبتحلقش  انك تعد
خلي املك حصان رهوان وقت انطلاقك مستعد

حتى لو هتكمل لوحدك .. اوعه تقف مش مهم

مش مهم مين معاك المهم ميموتش حلم

وان ملقيتش حيفضل معاك .. اياك للحلم تنسى

لو محدش كمل معاك .. املك جواك .. وكمل انت

كمل انت ... 

صقفوا له

                 
                             صقفوا له


صقفوا له صقفوا له
ده كان معانا العمر بطوله
وغصب عنه راح وساب سكة وصوله

السلام امانه مني ان صادفته وصلوا له

وان لقيته في عز فرحه ابقوا افرحوا له

حتى لو مع غيري عادي طبلوا له

ولحن السعاده هديه مني غنوهوله

بس امانه ان سألكوا عني اوعه تقولوا له

وان لقيته بيبكي بعدي قربوا له

سيبوا دمعي يسيل ودمعه هو ابقوا امسحوا له

واوعوا تنسوا تصقفوا له

صقفوا له .... صقفواله

لو عمل وياكوا موقف عدوهوله

وان لقيته فرحه ناقص خدوا من فرحي كملوا له

وان سألكوا لسه فاكره اوعوا تقولوا له

اخاف عليه يحن تاني لقلب صانه زمان بطوله

وان سألكوا عن كلامي وصلوا له

اني بعده لحد بعده مش هقوله

وطمنوه عني ان سألكوا وابقوا قولوا

قولواله كان ليك حبيب غالي خلاص غير ميوله

واوعوا مره اصعب عليكوا ان سألكوا توصفوا له

لا لا لا ده انا عايز منكم بس تفرحوا له

وصقفوا له .... صقفوا له


         صقفوا له

الحريف

الحريف
.........

حريف

خدعت القلب النظيف
بجد تستاهل تصقيف
حريف
لعبتها صح وعلى كيفك
شاطر ولايق على زيفك

بترسم ف مشاعرك وتلون

مع كل لون عادي تتلون
ومع اللي يصونك بتخون

وعندك لعذرك ١٠٠ تأليف

بجد شاطر اوي حريف

لعبتها صح وبجداره

صياد بلا شبكه وسناره

غاوي جرح القلب اللي بيهواك
وبتجري ورا القلب اللي رماك
ولما تشوفني بترسم دور
طالع فيها اوي ومغرور

والناس فاكرينك احلى شعور

والاحساس عند الوان طيف

بجد شاطر اوي حريف

حريف

لعبتها هايل ملعوبه
هتخدعنا تاني بصعوبه

مصدقش كلامك مهما اتقال

القلب الطيب مبقاش ميال

بطل بقى تلعب على قلبي

انا فوقت وبدلت متابعي

ووقتي الضايع مبقاش ضايع

مش هشتري قلبك لو بايع

واعتبرني ماتش وعدى عليك وخسرته

او تبديل في وقت غلط بدلته

واعتبر قلبي اللي كسرته
كان مجرد وش الضيف
بجد شاطر اوي حريف

فير & زارا 4

                              فير & زارا

وبعد ما فير ودع زارا

وسط دموع بتسيل بغزاره

ركب في مكانه في السياره

فجأه رجال شرطه بتوصل

وجوه السياره بتدخل

طبعا وهو لسه في باكستان

خدوا فير وهو في حالة كتمان

وفي قاعه من قاعات الاستجواب

اسئله كتير وهو بيرفض الجواب

وف الوقت ده اتفتحت الباب

ودخل خطيب زارا وبيقول

كنت فاكر هتفلت مني مش معقول

طيب ازاي وزارا هتبقى مراتي

انت بعملك دمرت حياتي 

ولو عايز زارا تبقى متهنيه معايه

هتعمل دلوقتي اتفاق ويايه

هتمضي انك جاسوس على بلدي

وزارا هخليها سعيده عندي

لو اتكلمت يوم او فكرت

يبقى انت اللي جنيت عليها ودمرت

انت في يدك سعادتها او زعلها

دي شروطي ولازم تقبلها

ومضى فير على انه جاسوس

وفضل جواه احساس مش محسوس

٢٢ سنه فاتت

وهو علشان زارا صامت

ولا بيتكلم ولا بيرد

وسنين كتيره بطل يعد

كل اللي بيعمله بيطلع خلخالها

وبيقول تلاقيهم كبروا دلوقتي اطفالها

وفي يوم جات المحاميه الشاطره

اول قضيه ليها بس مذاكره

بتفتش في قضايا حقوق الانسان

وكل المساجين في باكستان

وحظ فير انها انسانه 

وعملها كان كله امانه

دخلت زنزانته الانفراديه

قالت له ايه جابك بلادنا ديه

مش معقول يكون اسمك زي ما بيقولوا

انا عارفه انك فير . واندهش لما سمعها بتقوله

بس مردش وحاولت معاه

قالت له دي اخر فرصه ده حلم كل سجين بيتمناه

اتكلم معايا يافير وبلاش عند

قضيتي اني ارجعك تانى الهند

فضل ساكت ومش ناوي ع الكلام

وحست بالفشل وقالت له سلام

وهنا مرت من جنب السجن طياره

قالها على مواصفتها بكل جداره

فرحت وقعدت جنبه تسمع حكاويه

قالها اسم فيراول مره حد يناديني بيه

وده اللي شجعني احكي لك الحكايه

بس لو هتستخدمي اسم زارا يبقى خليها جوايه

وقالها القصه كلها

قالت له قضيتك سهله حلها

هتحكي حكايتك مع زارا

قالها دي تبقى اكبر خساره

ده انا فضلت محافظ عليها سنين 

اضحي بيها عشان ابقى حر ليومين باقيين

وتلاقيها دلوقتي سعيده ومتهنيه

دوري على حلول تانيه غير ديه

اتكلمي عن اي حاجه اي شئ الا هي

ده انا ٢٢ سنين بحرس سعادتها

٢٢ سنه حتى عن حيطان سجني خبيتها

لا يا استاذه زارا مش للبيع

زارا مش مسموح لسبب يخليها تضيع

قالت له كده انت هتفضل مسجون

انت ايه سجين ولا مجنون

قالها مجنون بس جناني عقل

وسجين السجن من صمتي مل

انسي زارا ودوري غير كده على حل

قالت له هسافر بلادك 

واجيب دوسيهك وشهادة ميلادك

بعد ما قالوا عنك انك ميت من زمان

من اول يوم جيت لبكاستان

هسافر لبلدك وارجع لك حق الانسان

وسافرت وسألت على بيته

الاب والام ماتوا حزانه على موته

ولقيت مكان البيت مدرسة البنات

اللي حطت حجرها اساسها زارا من سنوات

ولقيت المفاجأه الكبيره معانا شوف

حب مقدرتش تقتله اصعب ظروف

لقيت زارا وصاحبتها بيعلموا بنات الهند

وفير هناك بيضحي بحياته بأصرار وعند

وقالت لها زارا لما سمعت بموته

كل شئ قررت افوته

ومات الاب ورفضت الخطيب

ورحل عن باكستان وقرر يغيب

جيت الهند احقق حلم فير

اصل فير ده معنى كبير

وقالت لها المحاميه عن اللي حصل

وان فير سجين سعادتك في المعتقل

ورجعت زارا تاني مع المحاميه

عشان فير يطلع براءه من القضيه

 وفي المحكمه قبل ما تدخل حسها

وقف وناحية الباب حس بهمسها

ودخلت هي زارا بتاعت زمان

بس الشعر الابيض كتر وبان

وآه منه اللقا بعد سنين فراق

ومليون آه من معنى كلمة عشاق

وهنا خلاص نهايه سعيده وتنزل الستاره

على اروع قصه .. قصة ( فير وزارا ) .

فير & زارا 3

ورجعت زارا لبيتها

وقالت الحكايه لامها وصاحبتها

صرخت الام فيها اخرسي

متحكيش تاني عنه ولا تتنفسي

انتي فرحك قرب خلاص

وابوكي عزم كل الناس

وابوكي مغرم وبيحلم بالسلطه

مش هتنفع منك ولا غلطه

مستقبل ابوكي بين ايديكي

حطي كلامي دايما قصادي عنيكي

عشان كلامي يقدر يشيل اي حاجه وينسيكي

قالت زارا ده قالي هيقدم لي حياته

قالت الام ده كلام في الشعر بس وابياته

مفيش راجل قدر يتخلي عن حياته لبنت

ده مشوفتوش حصل طول عمري قد ما عشت

قالت زارا انا واثقه انه ده موجود

في الانسان اللي قابلته عند الحدود

صرخت الام وقالت لها كفايه

قصتك دي لازم تكون لها نهايه

خطيبك ده راجل واصل ومهم

واسمعي مني نصيحة ام

ده هيخدم ابوكي ويساعده

ده اللي انتي بكره رايحه عنده

وقامت الام وخرجت من اوضتها

وبكت زارا وقالت لصاحبتها 

انا شايفه فير قصاد عيوني

دايما قدامي مش هتقدروا تنسوني

اعتبروني مجنونه بيه بس انا واثقه انه كمان مجنوني

وراحت صاحبتها واتصلت بفير

قالت له زفاف زارا بكره ومفيش تأخير

قدم استقالته وشد الرحال

 ومنسيش يجيب وياه الخلخال 

ولما وصل لقي يوم الزفاف

وقف بعيد ومكانش متشاف

بس زارا حست وبصت وراها

جريت ناحيته والعيون كلها متابعاها

سقط ابوها مصدوم ع الارض

ياترى دبل الورد ولا فتح ورد

ومشي فير وزارا مع بعض

وفي اخر الليل كان فير

عند صاحبة زارا بيقتله التفكير

وجات ام زارا تدق الباب

دخلت وهي ماليها العذاب

قالت له زارا كانت بنتنا

دلوقتي ملكك انت مش ملكنا

رجع لي بنتي ابوها بيموت

لومات بسببك مش هتكون مبسوط

بكت الام وقالت له تمم جميلك يافير

زي ما انقذت حياة زارا انقذ اب كبير

قعد فير يمسح دمع الام السايل

قالها الام تأمر مش محتاجه تتحايل

احنا فعلا مشوفناش غير بعضنا

احنا فعلا عمتنا مراية حبنا

بس مش هنبني الحب على حياة انسان

متخفيش بكره هيرجع كله زي ما كان

ومسح دموعها وقالها متبكيش 

كله هيتصلح متخفيش

قالت له هو كل ابن في بلادك يشبه لك

قالها معرفش بس كل ام في بلادي مثلك

ومسح دموع ام بتسيل بغزاره

وتاني يوم راح يقنع زارا

قالها احنا غلطنا وحبنا كان بخساره

قالت له عندك حق انا غلطانه

انا اللي شاركتك لحظات من عمري فرحانه

كانوا لحظات ولازم  حذفها

وبكت وحط ايده على كتفها

وقال لها .. 

اللحظات دي كانت اجمل عمرنا

اللحظات دي صنعت قصة حبنا

اللحظات دي اللي هنعيش عليها

اللحظات دي انتي اجمل ما فيها

ويمكن بكره تجمعنا سنين

وكل حد عنده اطفال صغيرين

واخدك على العجله ورايا

واحقق حلم ابويا فى النهايه

ضحكت وقالت له مش هنقدر هنبقى كبار

ضحك وقالها هبدل العجله بجرار

والضحك والهزار بتملاه الدموع الكتار

وقالها فير واجبك دلوقتي بيتك

اوعي تخليني اندم اني حبيتك

صوني بيتك وصوني خطيبك

خليه هو دلوقتي حبيبك

ومشي فير ومشيت زارا

والدموع الحاره بتسيل بغزاره

فير & زارا 2

وعدى بيها النهرفي منتهى الجمال

بس اتقطعت فرده من الخلخال

حطها في جيبه وكمل مشواره

لحد ما وصله لاهله وداره

وابوه وامه فرحوا بيها

وطلبت من ابوه مدرسة بنات يبنيها

عشان تتعلم كل الهنديات

وده حق للولاد وكمان البنات

وفي نفسه الليله

كان في حفله جميله

نادى الاب على زارا

وفي ايده حجر من الحجاره

وقالها تعالي حطي حجر الاساس

لمدرسة البنات قدام كل الناس

وفي تاني يوم

صحي الاب من النوم

ونادى على الابن فير

قاله حلمت حلم خطير

قاله شوفتك ع العجله وهي وراك

حاطه ايدها على كتفك وسانداك

قال فير بس دي باكساتنيه

قال الاب متفرقش باكستانيه هنديه يابانيه

المهم اني انا شوفتها هي

هي دي اللي شوفتها بتسندك

هي دي اللي هتقدر تسعدك

ابقى قولها وانت بتوصلها للمحطه

اوعه تضيعها دي تبقى اكبرغلطه


وعلى سلم المحطه الهنديه

كان ماشي هو وهي

لمحت خطيبها من بعيد

اتسمرت زي قضبان السكه الحديد

قرب منها خطيبها يطمن جرالها ايه

سلمت وقدمت له فير يتعرف عليه

اول ما سمع فير كلمة خطيبي

ماتت جواه فرحه ومليون كلمة حبيبي

ده لسه مقلهاش على حلمه

ليه هنا غير المؤلف قصة فيلمه

وراحت مع خطيبها يجيبوا التذاكر

وجلس فير مش قادر

ورجعت هي قالت له عارفه

نسيت اكلمك عن خطيبي انا اسفه

قالها سببتي لي جرح خطير

بعد ما عشت حلم ابويا الكبير

ده انتي اديتيني من عمرك لحظات

وانا اديتك اجمل الذكريات

كل ده هنا جيه ع المحطه ديه ومات

وجيه خطيبها وقاله شكرا يافير

ازاي ارد لك جميلك الكبير

قاله فير لو عايز ترد الجميل
اوعه تخلي زارا دموعها تسيل

لو خليتها فرحانه وسعيده دايما

انا اللي واجب اقولك شكرا

قاله خطيبها خد بالك وحاسب

كلامك ده ولا وقته ولا مكانه المناسب

اخاف تكون وقعت فى حبها

اخاف تقولي انك بتحبها

قاله فير انا معرفش يعني ايه الحب

بس بتمنالها السعاده من جوه القلب

لو ده معناه حب يبقى بحبها

انما الافضل تعبره شئ وانتهى

انا ماشي وانت اللي هتفضل ليها

قلة ذوق مني لما اوصيك عليها

ومشي خطيبها وهي واقفه

بتبص على فير بمنتهى اللهفه

قالها لو في يوم ضليتي الطريق

او احتاجتي لانقاذ صديق

افتكري انه في انسان موجود

هيضحي بعمرك عشانك عند الحدود

وركبت القطر وبصت من الشباك

طلع الخلخال شاورت له خليه معاك

ومشي على قضبان السكه قطرها

ياترى هيكمل حبهم ولا انتهى

فير & زارا 1

فير & زارا

( اسطورة الحب الممنوعه )
..............

كان شاب هندي واسمه فير

كان قائد سرب طيران بيطير

كان قائد سرب الطيران

وبيلف حدود بين هند وباكستان

عشان ينقذ اي حد عبر الحدود

علشان يخليه لبلاده يعود

وكان بيواجه كل المخاطر

ويرجع لأهله كمان فى الاخر

وكانت احلى بنوته هي

كانت بنت جميله باكستانيه

وكان عندها مُربيه هنديه

وكان ابو زارا حياته كلها سياسيه

قرر يجوزها لابن راجل واصل

عشان يساعده وميبقاش فاشل

واتخطبت زارا .. وياخساره

في يوم خطوبتها بتموت المربيه الهنديه

وبتوصي زارا اخر وصيه

انها ترمي رمادها في مياه الهند

وزارا ولامره راحت الهند

بس الوصيه ..

خلاها نسيتها انها باكستانيه

ولازم تعدي الحدود الهنديه

وخدت الرماد في الجره

وركبت ناحية الهند لاول مره

وعلى الحدود اتقلبت السياره

اللي كانت فيها زارا

وقائد سرب الانقاذ فير

كان فوق بيرفرف ويطير

وبينزل من طيارته بحبل

ويرفعهم للطياره وده كان الحل


انقذهم كلهم عبر الحدود

ولاخر واحده باقيه بيعود

وكانت طبعا هي زارا

نزل لها بحبل من الطياره


ومسكها والجره في ايديها

والشعر بيرفرف بيضايق عنيها

حاول يبعد الشعر بأديه

واحلى بنت شافتها عينيه

بس اللي حصل كان حاجه مره

لما بصوا لبعض وقعت الجره

صرخت فيه نزلني نزلني

قالها ممنوع .. قالت له نزلني

ولو مش هتنزلني بلاش توصلني

ونزلها تاني وجابت الجره

وع الحدود قالها كام جمله مُره

قالها حسستيني ان عملي تفاهه

مهما كانت الجره واللي جواها

كنت فخور بعملي عشان بنقذ حياه

انما بسببك دلوقتي لا


قالت له ليك حق طبعا تثور

بس اوعه تبطل تكون فخور

الجره دي فيها امانه ووصيه

فيها رماد انسانه هنديه

وده اللي خلاه اعجب بيها وعذرها

وخدها معاه وعند النهر وصلها

قالت له تعالى شارك ويايه

حط ايدك ع الجره معايه

ولا انا ولا انت ولاد الست ديه

بس جمعتنا سوا هندي وباكستانيه

وحط ايده معاها وهو فرحان

حس انه فعلا بمعنى الانسان

واخر اليوم قالت له شكرا

ده كان يوم مش هنساه ابدا

اطلب وانا هرد لك الجميل

قالها طلبي يمكن يكون مستحيل

قالت له اطلب واوعدك تنفيذ

قالها بتوعديني قبل ما اطلب وطلبي عزيز

قالت له قول ولا يهمك يافير

ده انت عملت معايه اكبر خير

قالها شاركتيني ذكريات يوم من عمرك

نفسي اشاركك ذكريات يوم هتسرك

وعدى بيها النهر
.

في ليلة وداع

في ليلة وداع
....................
.
.
.

في ليلة وداع كانت هنا

دوسنا اوي على قلبنا

وقدرنا نفارق  ونمشي

انت سكت وانا حاولت متكلمشي

وسبنا السكه تفرقنا
من بعضنا قدرت تسرقنا

يا خساره يا احلى سنين جايين

جايه بعد ما فرقتي قلبين عاشقين

طب جايه ليه . ليه
طب جايه لمين

لقلب حزين والتاني مسكين .... ولا قلب واصبح قلبين

آه ياسكة بكره يا اللي انتي بعيد ..آه بعيد

ليه بعد ماكنا سوا ليه امشيكي وحيد .. وحيد

ليه اللي باقي من لياليكي شوية آهات

ليه يعني الحاجات الحلوه لازم تصبح ذكريات

وكل ده كله ليه كله ضاع

فى ليلة وداع .... ليلة وداع

مالك يا سكتنا غريبه مش انتي خالص

كل اللي فيكي تمام بس كله شايفه ناقص

ليه اللي كانوا بيمشيوا فيكي هونتي عليهم

ليه اللي كانوا بيملوكي فرحه نسيت عنيهم

دول كانوا زمان في زمانهم بتاع زمان

طيبه ومحبه وحنين وحنان كمان وأمان

مكنتش اتصور ييجي يوم واقول ده كان

فينك يا ضي سكتنا ليه انطفيت

فينك يا قلب كان جنبي ليه اختفيت

هو انت اللي مشيت وفي سكه تاني ابتديت

ولا انا اللي بجد قولي اللي انتهيت

ولا مين ولا ايه بس اللي ضاع

في ليلة وداع . ليلة وداع

خوافه

خوافه
........

خوافه
.
.
خوافه يادنيا الاحزان اوي خوافه
بتهزك ضحكة قلب عسل شفافه

والناس الخايبه اللي بتزعل هنقولها ايه

ايه فايدة زعلك لو مش هيفيدك تزعل ليه

دي الضحكه الحلوه بتسعد غني وفقير او بيه

انما تزعل لا.. ولا تشيل جواك

حاول تنسى الحزن هتلقى الحزن بينساك

حاول جرب  طعم الفرحه ودوقها

فيها ايه يعني لما الافراح تعشقها

حلوه الضحكه لما ع الوش تكون متشافه

خوافه .... خوافه
خوافه يا دنيا الاحزان اوي خوافه

بتهزك ضحكة قلب عسل شفافه

اضحك بقى خلي افراحك تملا الوش

هتلاقي احزانك جنب الضحكه تخاف وتكش

واكتب على حزنك مشي او غاب

والفرحه ان جات لك اوعه تدور على اسباب

حاول تفرحها وبس وحس وعيش وياها

ودنية حزنك وسط الفرحه خبيها او انساها

حلوه الضحكه خليها على وشك متشافه

خوافه .... خوافه

خوافه يادنيا الاحزان اوي خوافه

بتهزك ضحكة قلب عسل شفافه

خوافه ... خوافه

سلم ع الصحبه

سلم ع الصحبه سلامات سلامات

عيش الحياه عادي امشيها
كأنك ملكش حبيب فيها
ده انا وانت مفارقين لياليها
وسلم ع الصحبه سلامات سلامات . سلم ع الصحبه سلامات

دي مهما طالت اعمارنا
الفرقه حقيقة اقدارنا
بندعي ربي يصبرنا
وسلم ع الصحبه سلامات سلامات.  سلم ع الصحبه سلامات

ليه تعيشها بقلب جريح
واللهْ ما تستاهل غير تفاريح
اصلها دنيا زي المراجيح

وسلم ع الصحبه سلامات سلامات. سلم ع الصحبه سلامات


ونمشيها ولا هنقفها
اقدارنا ولازم هنشوفها
خد منها الفرحه واخطفها

وسلم ع الصحبه سلامات سلامات. سلم ع الصحبه سلامات

يارب عمري  اللي مسافر
يكون احلى مافيه الاخر
ده كله ماشي ومغادر

وسلم ع الصحبه سلامات سلامات . سلم ع الصحبه سلامات

دي دنيا عماله تتمرجح
كل اللي جاي بكره مروح
امانه يا بكره لو تسمح

سلم ع الصحبه سلامات سلامات . سلم ع الصحبه سلامات

سلم ع الصحبه

ليل السهرانين

.....
.....
.....
.....
متشوفش وحش .. لأ ما انا شوفتك
يخرب بيت بقى معرفتك

عسلك ده ليه يشبه زفتك

وأسأل على ليل السهرانين السهرانين

خدت ايه انا من وشك
غير كدبك وملامح غشك
عايز سمكري ياجي يرشك
وأسأل على ليل السهرانين السهرانين

شرق او غرب هوينا
من غير ملامحك خلينا
ياغيمه سوده ف ليالينا
واسأل على ليل السهرانين السهرانين

امشي بقى ويا حظوظك
مش فارقه هزيمتي من فوزك
يستاهل بقى اللي يعوزك
واسأل على ليل السهرانين السهرانين

قصيده مكتبتهاش

قصيده مكتبتهاش

*******

قصيده مكتبتهاش

من اول نقطه فيها مكملتهاش

وقولت لقلمي كفايه نقطه فيها ومتعديهاش

اصلها قصيده غاليه وعشان غلاوتها مرخصتهاش

وكنت هزعل اوي لو كتبتها وقلوبكم محستهاش

فقولت بلاش

اصل الكلمه اللي متتحسش متحلاش

وانا بصراحه يعني مقولهاش

وفي كلمه غاليه متتقالش وكلمه عاديه متتخباش
بس في كلمه احساسها وده االي بنعمله فلاش

الاحساس ده  بيوصل بالبريد السريع وكاش

هو ده الاحساس لما يتحس ميستناش

انما لو مش هيتحس يبقى كلمتك الغاليه مترخصهاش

وان لقيت فكره عندي او كلمه ومحسيتهاش

يبقى نصيحه مني اعتبر نفسك مقريتهاش

وانا كمان هعتبر نفسي مكتبتهاش

عسل ابيض

.
.

.

.
ياللي قلبك عسل اسود
قلبي اتعود .. يحلم وياك

ملقيتش ف الالوان خالص
وانا مش ناقص .. ولا لحظه بلاك

تعالى نبدل احزانا
ونزوق بكره بألوانا

 نرسم الضحكه الحلوه على قلب حزين

نلون حياتنا قدامنا نخليها جرين

اما بقى لونها الكاتم
لأ مش لازم .. اعمله ديليت

ارضى واقبل بنصيبك
بردوا يصيبك .. مهما اتخبيت

واشكر ربك ع الصحه
 لما تنام ولا بتصحى

وخلي حياتك قدامك اجمل بستان

زوقها وارسمها بكيفك بأجمل الوان

وخلي بقى لونك الاسود
يلف يحود .. عن ضي عنيك

خلي قلبك عسل ابيض
هتكون اجمد .. ضحكة لياليك

تعالى نبدل احزانا
ونزوق بكره بألوانا

ياسلام ياسلام

سواق التوك توك

.
.

.
.

.
.

سواق توك توك
ماشي و بيعُك
بيلف حواري .  في المداري

على عجلاته كمان بيزُك

ماشي بسرعه
وملهوش دعوه

ولا بيقول حاسب ولا اوعه

فجأه وهو بسرعته طالع

كان في طفل معدي الشارع

وام الطفل الناحيه التانيه

فاتحه له احضان قد الدنيا

وابن صغير . ضحكته سكر .. اجمل منظر

في الوقت ده كان تتصور .. بيعدي السواق متهور

الطفل بيعدي ولا يحذر والسواق متسرع بيزمر

حاسب ...حاسب

كل دقات قلب الام وقفت هنا

ميعرفش غلاوة الابن غير اللي بيفقد الضنا

حااااااسب ..... بعلو صوتها بتقوله حاسب

بس القدر كأنه محدد الوقت المناسب

وآه .. ايوه آه من صرخة أم
وهي بتحضن اوي وتضم

وبسمة ابنها من غير صوت

بأخر جمله وكان بيموت

قالها يا امه وحياة ضحكي

اياك تزعلي واياك تبكي

وحياتي .. ولا بلاش وحياتي

وحياة سهرك جنبي ليلاتي

وحياة ضحكتي ويا ملامحي

انسي يا امي وكمان سامحي

والسواق جري ولابص وراه
والخوف والرعب بيملاه

عقله مشتت .. وبيتلفت
خايف حد يحس خطاه

وآه وآهين من دعوة أم

وسط ايدين مليانه بالدم

والسواق خد منها حياه

قالت له روح منك لله

ادي ياعم ... دعوة أم
وأدي كمان سواق التوك توك


جري سواق التوك توك خايف

قدام منه خلاص مش شايف

كان هيلف ويدخل شارعه

بص يشوف لو حد متابعه

وآه ياعيني ده بص وراه

كان طالع فى ساعتها ضناه

وصدم ابنه
.. وقف جري حضنه

ذنب الطفل بيدفع تمنه

وأدي ياعم .. دعوة ام
وادي كمان سواق التوك توك

لما قالت له منك لله

كان تمنها هو ضناه

شاله على ايده بعد مماته

وقدام بيته ياعيني مراته

صرخت فيه بعيون بكايه

وهي بتصرخ آه يا ضنايا

خطفت طفلها من ايد الاب

وضمته اوي اوي جنب القلب

بتكلم فيه طبعا ما خلاص

بتصرخ وتقول يا اعز الناس

بصيت للأب بعين اللوم

قالت له ده انا صحيته م النوم

وهزر معايا احلى هزار

وقال جهزي لي احلى فطار

وكنت لسه هنادي عليه

قتلته ليه ... قتلته ليه .. ليه ؟

رد الاب .. مقتلتهوش

ده انا كنت بجري جري الوحوش

عشان احوش له كل قروش

ورغم سرعتي آه. .
لما صدمته ملحقتهوش

ملحقتهوش
 ..
بس ده درس وكان اسي
هفضل فاكره ومش ناسي


ومن ساعتها اتعلم يمشي

براحته خالص ميتسرعشي

نوى قبل ما يكون سواق

انه يكون صاحب اخلاق


يعني بالراحه مش يجري

على خطه هيمشي كمان دوغري

ولا هيلف ولا ولا هيعٌك

ادي قصته.. سواق التوك توك

الدنيا لما بتتغير

الدنيا لما بتتغير
مبتخليش حد صغير
كله بيقدر .. كله بيكبر

كله من قيده بيتحرر

واما بيظهر .. بيغلط اكتر

وبيكدب وكلامه يحور

تشوف المنظر . فعله يحير

ولغلطه دايما بيبرر

والناس تقول ده عليه متنور

ادي الدنيا لما تغير

لما يموت جواها الجوهر

ممكن جدا عادي تتصور

الابن مع ابوه بيتهور

ياخساره ع الزرع الاخضر

لما بيدبل يصبح اصفر

دنيا فانيه بعُمر قصير

ودي دنيتنا لما بتتغير

هي

لما تعدي .. كله يهدي
وبيستنوا يبصوا عليها

بيقولوا حلوه .. كأنها غنوه
وكله لبعضه بيوصف فيها

وفي مره وانا ماشي في حالي

زي عوايدي ولا على بالي

كانت هي جايه قبالي

كل الناس بتشوفها تبص


 بتعدي فى شارع تعمل حس

وانا لما عدت ولا بصيت

ولا استنيت ولا ولا هديت

وحواليها العشاق طوابير

زي ماتكون نجمة جماهير

وفي مره تانيه كانت بالصدفه

لما قابلتها راحت واقفه


قالت لي قولي حكايتك ايه

مش بتعمل زيهم ليه

تكونش بقى مش معجب بيا

ولا حلاوتي حاجه عاديه

قولت لها ان جيتي للحق

انتي حلوه مقولتش لأ


قالت لي اومال طب مالك

ليه لما بتشوفني قبالك

ليه عامل مش واخد بالك

قولت لها  فعلا وانا مالي

صدقيني مش باخد بالي

قالت لي مش بتقول ان انا حلوه

رديت بسرعه وقولت انا ايوه

حلوه انت ولا زيك ست

واحلى منك مفيش غير بنت

قالت بغرور وبسرعه رهيبه .

احلى مني دي حاجه عجيبه

احلى مني مين ديه

قولت لها الاحلى منك هي

قالت لي .. هي .مين هي ؟

قولت لها هي اللي مش زيها انتي

هي اللي انا بس بقولها حبيبتي

هي احلى فى الجمال والاخلاق

ومش بيمشوا وراها طوابير عشاق

هي اللي ولا تتقارن بغيرك ولا بيكي

هي اللي شايف عنيها حتى في عنيكي

هي اللي بتخليني شايفك حاجه عاديه

اما هي .... يوووووووه ياريت حلاوتك ربع ربع حلاوتها هي .

مش مجرد بنت

.
.
.

.
انتي
.
ايوه انتي

انتي عندي مش مجرد بنت

ده انتي اشيك وحده ست

وحلاوة ستات بلدنا جنب حلاوتك تلت

ده انتي وسطيهم زي زهره حمره وسط فدان لفت

ههههه
تشبيه على قده لكن عجبني خلاني ضحكت

لو كان ليا فى الرسم كنت رسمت عنيكي ولونت

ولو ليا في الغزل كنت قولت فيكي واتغزلت

ولو ليا في السهام كنت بسهم الحب على قلبك نشنت

بس انتي عندي مش مجرد بنت


حاولت اكتب كلام عنك بدال ما ارص الكلام توهت

لقيت الكلام بيتوه لا كتبت  جمله ولاكونت

انتي اللي يشوفك يتسمر لا يقدر يقول اعجاب ولاكومنت

انتي  اللي انتي وبس ولا زيك في فضائيات ولا نت

اصل انتي عندي مش مجرد بنت

حاول تكون

حاول تكون
...............
.
.
.
.
حاول تكون انت .. حاول تكون شخصك
ما اهو مستحيل تقدر .. تعيش بلا نفسك

حاول تكون انت .. وحاول متشبهنيش
ما اهو مستحيل نقدر . بوش غيرنا نعيش

ربك خلقنا كده .. في الدنيا نكمل بعض
يمكن نختلف وارد .. بس اختلاف بالود

جايز حدودنا بعيد .. وبتبعد بنا المسافات
وجايز اقابلك يوم .. ونحس كأننا اخوات

وجايز تصادف ناس .. بتشد فيك لبعيد
وجايز كمان بردوا . تلاقيك بتمشي وحيد

عادي ومهما يكون .. عيش الحياه بعيبها
اوعه تكون غيرك .. وتفتكر انك هتعجبها

حاول تكون انت .... بكل مافيك هتعيش
ولاانا هكون شبهك .. وانت متشبهنيش

حاول تكون ...... انت

غير متاح

تيرا ريرا را
كان عُمر وضيعناه

عادي ياغالي ميجراش

ما اهي اصل الايام ببلاش

وايه يعني كام سنه

وايه يفرق عمري انا

ياخساره .... بجد يامليون خساره

ع العُمر اللي اتباع بخساره

تيرا ريرا را

كل اللي فات انساه

هبقى زيك معاك

فيها ايه لما انا انساك

ياللا بقى خليك لغرورك

لايق عليك وهينفع دورك

اما انا بقى مليت تمثيل

ومش محتاج احكي التفاصيل

امشي بقى نسيني عنيك

واللي يغلط ويرن عليك

خليك صامت او غير متاح

عشان تبقى كمان مرتاح

كل الاسامي يمكن تشوفها

كل المعاني هتفهم حروفها

الا اسمي خلاص بقى

نفسه بقى يبطل شقى

قررت ابعد عن اي جراح

وهعمل زيك غير متاح

اوعدني تنسى

حطيت ايدي على كتفه وقولت له  متمشيش
.
اسمعني حتى لو كنت متعرفنيش





وقبل ما تحتار اوي فيا

انا قبلك كنت بحبها هي

وهي طبعا حاجه مهمه

عشان كده هقولك كام كلمه

كلام صعب عليك بجد

بس هطلب منك وعد

اوعدني تنسى .
عشان هي مبقيتش ناقصه.

ياه بقى قدرت عليها تأسى

قتلت فيها ملامح الانثى

غيرتها خليتها مش هي

هي اتعلمت منك معنى الاذيه

ليه تعبتها جنبك ظلم واسيه

ولسه عايز  تاني تكمل عليها

لسه غرورك بيعشق دموع عنيها

لأ بقى ... بجد يعني ده كتير عليها

ابعد خلاص وبلاش تأسى

هي دلوقتي مبقيتش ناقصه

دي ماتت على وشها ملامح الانثى

اوعدني تنسى.


بلاش بقى طبع الانتقام

اللي حصل لها بجد حرام

وقبل ما تتهمني اي اتهام

دفاعي عنها مش محتاج ملام

انا قبل منك كنت بحبها

ولما لقيتها بتحبك سبتها

اوعه تقولي ان انت الاولاني

دلوقتي متفرقش مين الاولاني

احنا الاتنين فينا صفات الجاني

مش هتفكر هي تاني تحب تاني

انا سبتها وانت مصونتهاش

احنا اللي افتكرنا عمرها ببلاش

بس خد بالك هي دلوقتي مبتحبناش

هي دلوقتي على حبنا مبقياش

تعرف لو انت شوفتها دلوقتي متعرفهاش


هي بقيت وحده تاني مش هي

بقيت مع اللي يقرب منها مؤذيه

بقيت مستعده تكون انانيه

بس مش مستعده تاني تكون ضحيه

تعرف حتى ملامح الحلاوه

اتحولت كلها وبقيت عداوه

ياه .. يا خساره انا سبتها  واتعودت  انسى

وانت اساوتك قتلت فيها ملامح الانثى

اوعدني تنسى


هي دلوقتي وحده غريبه

اوعه تتوقع منها طِيبه

مش هتقدر تزود الامها ألم

دي حالفه تدوقك من كاس الندم

خد بالك .. دي ناويه لك

هترد ليك الألم مليون قلم

متستغربش وتقولي ياه اتغيرت

ايوه بقى  هي اتغيرت

ولا بقيت طيبه ولا مسامحه ولا باقيه على انسان

هو كده بيتغير القلب اللي من حبايبه اتخان


اوعه تقرب اوعه تكمل عليها

اوعه تغرك المره دي الضحكه اللي في عنيها


مش هي ... ابدا صدقني مش هي

دي ضحكه خداعه وراها ألغاز مداريه

ابعد بقى وسيبها

كفايه زمان كنت تاعبها

لاهتسمح لك تتعبها تاني ولا هتقدرتاني تعجبها

خلصت .. بجد معاها كل الحاجات خلصت

حتى القلوب بالنسبه ليها كمان رخصت

عارف انت حتى ضحكتها اللي كانت زي القمر


دلوقتي كأنها مكان وشها حطت حجر


مين السبب بقى دلوقتي متفرقش

المهم انت عليها متكملش

وامشي وبلاش تأسى

دي هي دلوقتي يدوب انثى

لكن ماتت فيها ملامح الانثى

اوعدني تبعد عنها
اوعدنى متقربش منها

واوعدني ... اوعدني تنسى

مين بيدق الباب ؟

كانت بتعدي وكان جنبه

وكان بيهزر مع صاحبه

هز كتفه وقاله أهيه

بص هناك دي حبيبتك جايه

ضحك وقاله ماشي ياصاحبي

خليك حلو وقوم من جنبي

ده انا بكره مسافر وفايتها

هتوحشني على قد ما حبيتها

قوم بقى ياللا خلاص واتلم

قاله صاحبه ماشي ياعم

هخلي عندي شوية دم

بس اوعه تطول فى الغربه

قاله ان طولت عليك حق الصحبه

اتجوزها انت بدال مني

صرخ صاحبه وقاله هتزعلني

ده انا افديك بالعين والنني

ومتهزرش معاي في الموت

بعدك انا مبقاش مبسوط

ضحك وقاله ما كلنا هنموت
بجد لو مرجعتش ليها
انت يا صاحبي حافظ لي عليها

ومشي وجات البنت الحلوه

قعدت بس هي وهو

قالها بكره انا ماشي مسافر
قالت له اياك لحظه متبقاش فاكر

قالها هفتكرك مع دقات قلبي

ولو وحشتك بصي لصاحبي
قالت له اسكت يا تاعب قلبي

ده ناقص تقولي اتجوزي صاحبي

ضحك بصوت عالي وبيلالي

قالها دي فعلا حاجه كانت على بالي

ضحكت وقالت له كفايه هزار

سافر وارجع وانا ف انتظار

 ولو بنات الغربه كانوا حلوين

ضحك وقالها هداري عنيا بالكفين

وفات النهار ومشي وسافر

وهي صابره وصاحبه صابر

عادوا كل المتغربين

وهو غايب من سنين

اخباره مقطوعه وتليفونه المحمول

من كام سنه دايما مقفول

سألت كتير وقالت كتير وايه يفيد

سنه تمر وسنه تيجي ومفيش جديد

وفي يوم جالها صاحبه

والكلام بيتردد في قلبه

قالت له اتكلم عادي وقول

ده انت صاحب حبيبي قول علطول

قالها صاحبي طول غربته

وله عندي حق لصحبته

قالت له وضح قصدك ايه

مد لها بدبلته صوابع ايديه

قالت له اسكت بتقول ايه
متقولش كلام هيخليك نادم

صاحبك هيرجع انت فاهم ..

صاحبك عايش صدقني لسه

صاحبك مماتش انا متأكده وحاسه

حتى لو اسمه مات .. حتى لو وشه مات .

حتى لو ...

قالها اسكتي صاحبي عايش

صاحبي انا عارف انه طايش

وانه بيهزر وهيفاجأنا برجوعه

وهنا متحملش وسالت دموعه

قالت له متبكيش وامشي

بس تاني كلام كده متقولشي

صاحبك هيرجع انت فاهم

صاحبك هيعودي سالم وغانم

حتى لو الاسم مات
حتى لو الوش مات
حتى لو كمان الجسم مات

هيفضل حبيبي حتى لو بالذكريات

وادته ضهرها وشاورت له بالانسحاب

طلع من جيبه بهدءه جواب

وحطه على الطربيزه

وجنبه الدبله العزيزه

وقالها وقت ما تحتاجيني هتلاقيني

صدقيني انتي حبيبته ومش عايزك تحبيني


ومشي وفارقها بأهدى هدوء

ولفت وقالت له شكرا ياذوق

ولمحت الجواب وجريت تفتحه

فيه خبر مقدرش كلامي يشرحه

حبيبها مات .... والدبله ديه دبلته

والجواب ده من رئيسه في شغلته

بس الجواب من زمان خباه عنها الصديق

مقدرش يوصلها خبر موت صاحبه مقدرش يكون جرئ

حبيبها مات ... معقوله صحيحه السطور

حبيبها مات ... معقول تكدب الاحساس والشعور


قالت مش هحب بعده تاني مهما كان

هيفضل حبيبي على مر الزمان

وفات العمر يجري بيها والشعر الحرير اهو شاب

وفي يوم قعده وسمعت بصوت بيدق الباب

قامت تفتح الباب وهي مسنوده على الحيطان

حطت المفتاح ولفت وايدها بترتعش زي ايدين بردان

وسندت ايدها على بابها ووقفت .

ياه تتصوروا بقى مين شافت لما فتحت .

مين اللي كان بيدق الباب

فكر معانا في الجواب

.؟؟
.
الى اللقاء مع الجزء التاني من قصة ..
(  مين بيدق الباب )

لا مؤاخذه

لامؤاخذه

لامؤاخذه يعني افضل احبك .. طيب ليه

قولي انت بأمارة ايه

بأمارة الود ولا المحبه ولا الحنان ولا كل حاجه حلوه منك مشوفتهاش

ولا بأمارة كلمات الحب الجميله اللي انت مقولتهاش

ولا تكونش بأمارة جلابية الحنيه اللي انت فصلتها لغيرك و ملبستهاش

ولا بأمارة ايه ولا ايه ولا ايه .. بقولك ايه ما بلاش

وان كان على غرق مشاعر قلبي اللي كانت قبلك عايمه

ولا يهمك عادي بالهنا والشفا وسفره دايمه

ولا يهمك وايه يعني لما صحيت مشاعر كانت نايمه

وايه يعني لما توصف ولا تحلف ولا تخلف كله عادي

اصل قلبي كتبت عليه بعدك مش للبيع ولا للإيجار ولا فاضي

لامؤاخذه يعني هو اللي جرب يحبك ما خلاص

اصل القلب مهما كان طيب بيتغير لما بينداس


عيبك انك فكرت الحب كلمه وخلاص

الحب دنيا وحلم ووطن كبير واتنين بيتفجروا احساس

مش انت فاكرالحب كلمه تدسها

ده الحب حاجات مقدرش اقولها طالما متقدرش تحسها


اوعه تفتكر انك وصلت لحبي .. لأ . دي سكة حبي طويله وانت مش قدها


انت يدوب يمكن تكون وصلت لربع ربع ربع نصها

و عشان خاطرك انت انا كرمتها

يعني من الاخر سبتها

لامؤاخذه محبش اخلي قلبي يمشي سكه  كرهتها

معلش بقى اصل القلب مل

خلينا احسن نحسبها حسبة عقل

واما القلب اللي كان مربوط في ديل قلبك..

فبطل يحبك ..

معدتش تفرق ذنبي .. ذنب قلبي . ولا حتى ذنبك

اسمعها مني بطلت احبك .

لامؤاخذه يعني كبر وعيش

انا عن نفسي ميهمنيش


وان كان ع الحب والحنيه والكام يوم اللي بعترناهم

يووووه ده اقل واجب مع ناس بجد اوي حبناهم

اصل احنا لما بندي مش بندي كلمتين فوق سطر

احنا لما بندي بندي عُمر

ويووووه بقى على التسامح اللي بيدوب حبال الصبر


بس مشكلتنابقى . لما بنزعل زعلنا مُر

اوعه يغرك القلب الطيب .. ده دمه حُر

وسلم لي ع النقط والحروف والكلام والفواصل والسطور

وعليه العوض بقى فى الاحساس والشعور

ياللا بقى امشي وجرب الحب وشوف المعاني

وقول عني أسي ومُتعب وجارح ومش بيسامح وكمان اناني

بس ان رجعت لقلبي تاني

لامؤاخذه يعني ... قلبي دلوقتي غير قلبي الاولاني

ومتلومش عليا عشان بطلت اصدق حد بيبكي


ما انت سرقت طيبة القلب . واسترديت انا بعدك ضحكي

يعني من الاخر ولا تدمع ولا تطمع ولا ينفع كلام ولا تحكي

بعد ما جرحك غيري راجع لي انا و لقديمك

خلاص بقى اتعلمنا وشكرا على تعليمك

مشكلتك غرك صمتي .وغرك طبعي معاك

متبكيش ولا ده منظر وقتي .. من امتى الحنان جواك !!!

عجبي !! ده ١٠٠٠ مليون عجبي !!

لو قولت لي لما ترجع هترجع بسببي !


بطلت اصدق نقطه فى حرف في كلمة حب

عشان بطلت اتعامل بالقلب .

لامؤاخذه يعني ..... متفكرنيش بقلبك

عشان انت علمتني ابطل احبك .. فبطلت احبك.


ايه رأيك بقى في تلميذك النجيب

اتعود عادي يلاقيك بتغيب
.
تلميذك النجيب

اتعلم منك لما ينشن يصيب

بس مكنتش اتمنى اجرح في قلبك


 لامؤخذه بقى .... ما انت اللي علمتني ابطل احبك ... فبطلت احبك

لامؤاخذه يعني ...... لامؤاخذه

متبصش تحت قدمك

متبصش تحت قدمك
"""""""""""
متبصش تحت قدمك

مهما ايديك تعبت من ألمك

متبصش تحت قدمك

مهما زمانك في ناس حواليك راح صدمك

مهما بنيت ولقيت اللي بتبنيه راح هدمك

متبصش تحت قدمك

قوم وافتح لعقلك افاق

وارمي متاعبك ع الخلاق

وامشي وكمل سيبك من يأسك

متخليش ليله تنسيك عين شمسك

بس الشمس زي الحلم ..ان نومت هتصحى ومتلاقيهاش

اتعب تنجح .. مش راح تنجح كده ببلاش

اصل الحلم مايستناش اللي نعسان متغطي

الحلم هيتحقق للي يقوم يسبق ويخطي

وعشان انت محتاج للحلم

جايز انت تكون الحلم

فتش جواك .. صلح نفسك

متكلمنيش عنك .. سيبني احسك

سيبني اشوف جواك انسان

معنى بجد واضح ويبان

ومهما تقابل اوعه يهمك

اوعه يموت جواك يوم حلمك

ومتبصش تحت قدمك .

حلمت معاك

حلمت معاك احلام مش ممكن تتصورها

حلمت معاك بحاجات معرفتش اقولها واسطرها

حلمت معاك احلام احلى من كل حلاوه

حلمت معاك ولقيتك فى الحلم بتستهبل بذكاوه

هههههه

بطل شقاوه وحياة .. وحياتك انت بطلت شقاوه

وسيبني احلم بيك معاك
سيبني ارفرف واوصل فضاك

ولو مش عايز تحلم ده حقك .. بس حقي احلم معاك


حلمت معاك .. احلام على كيف الحب مش كيفي

حلمت معاك وطيفك يشبه النسمه الراقيه على صيفي

حلمت معاك . ولسه احلامي هتفضل مهما كان

حلمت معاك  .. وكل حلم قبلك كان كابوس احزان


سيبني احلم بيك معاك

سيبني ارفرف واوصل فضاك

ده انا حلمت معاك

متقولش اسف

جاي تقولي اسف .. ولا جاي تودعني ..اسكت اسكت متقولشي اسف ..اسكت بقى اسمعني يعني .حتى لو مش هقول . بس متقولش اسف
                         اسكت
اسكت متكملشي
انت متتأسفشي
حتى لو عايز تمشي
امشي ومتتكلمشي

اسف .. مش عايز منك اسف

اسف .. مش انت اللي تقول اسف

حكايتنا اكبر من معاني الاسف

واللي بينا فاق كل معنى حلو واختلف

مين اللي قالك الفراق يعني نهايه


مين اللي قالك القلوب العاشقه تقدر تكون نسايه

مين اللي قالك لما تمشي

هتنساك عنيه لو غمضت رمشي

ولا اقولك عادي جرب

 .. امشي وتعالى ..و ابعد وقرب

هتلاقيني متغيرتش زي زمني

بس يمكن ساعتها تعرف قيمتي وتمني

ولا اقولك ... مش مهم اقولك ولا اعيد

امشي لو عايز .. وهستنى ترجع من جديد

ولما ترجع انت عارف

متقولش اسف 

فضفضة قلم

برجع لك ياصفحتي .حاسس انها مسروقه كلمتي

نفسي اشخبط بشوية حروف متلخبطه

بس محتاج ناس تحس معاني الشخبطه

اصل الشخبطه مش مجرد خطوط وبس

كل شخبطه لها معنى وآه من اللي يحس

في شخبطه معناه فرحه. وشخبطه احزان

وشخبطه مبسوط اوي . وشخبطه زهقان

وفي شخبطه بتبقى فضفضه عن ألم

وصعبه ان شخبطهاشاعر معرفش يعبر بالقلم

اصل الاحساس  مش كلمتين يترصوا

الاحساس يعني ... يعني ... يعني

الاحساس ميتكتبش لكن الناس تحسه

حتى لو كان بحروف وخطوط متلخبطه

حتى لو كان لامؤاخذه يعني شوية شخبطه

فالصو

عيني على الناس اللي كانوا دهب خالص
الأصل راح منهم راح ولا باقي شئ خالص
هو ده طبع الحياه ولا طبع وجديد خالص
خلا دهبنا اللي كان خالص .. بقي خلاص فالصو




فالصو

كل الناس الغاليين رخصوا

بطلوا احساس ولا بيحسوا

كله خلاص باصص على نفسه

ليه الدهب الخالص بقى فالصو

فالصو


حتى نهارنا غير شمسه

مش باين بكره من أمسه

ساعاته بيعدوا ولا يتحسوا

والدهب الخالص بقى فالصو

فالصو



القوه على الضُعفه بيأسوا

وياكل حق الاخ فى ورثه

كله عامل ملك الترسو

ليه الدهب الخالص بقى فالصو

الدهب الخالص بقى فالصو

فالصو

كدابه

كدابه

كدابه يا احلامنا .. ولا فيكي حاجه بجد

نصحى نلاقيكي . زي هوا ومسكته يد

زيك زي السراب . نهايته عطش زايد

كدابه اوي جدا ولا فيكي شئ وارد

كلك خيال مفكيش نوبه حقايق

ييجي يصحينى النهار يلاقيني مضايق

فين الاحلام دي اللي كانت بتوهمني بأفراحي

فين الاحلام دي اللي كانت سهرانه صباحي

معقوله كانت كدبه حلوه في ليل طويل راحت

ولا نقطة ندى  طلعت عليها شمسها ساحت

ولا انتي يا احلامنا مش من حقنا اصلا

طيب بتيجي ليه وتفكريني كل ليل دايما

كفايه يا احلامنا جبتي خلاص اخري

امشي بقى ولا ارحلي او حتى كمان سافري

دوري على قلب لسه فيه شوية طيابه

قلبي خلاص بطل يصدق احلام كدابه