ليالي الحلميه
*************
وندق على باب النهار .. اصحي يا حلميه
صحي ولادك اللي ببدله وجلابيه
طلي مع نهارك الصاحي
ميلي بهمسه على ولاد السماحي
وروحي من بدري
آه ..صحي علي البدري
وغني موال العراقه على ناصيتك
واكتبي لحن الشهامه في نوتة غنوتك
وحشتنا لياليكي اللي راحت ومش جايه
وحشتينا ياليالي الحلميه
محلا الهوا لما يغازل ترابك
وبعبق التاريح بيطلوا احبابك
على قهوتك محلا ليالي زمان
ولمة اهاليكي وحلا سهر رمضان
ولا هزار ابن البدري مع غانم
كان ضحكهم الجميل بيفوق النايم
على نغمة صوت طبله بتدق ف شقة سماسم
ولما تمر جنبهم وتعدي من بابك
ايام الحلاوه والشقاوه ف كلام نازك
وحشتنا لياليكي اللي راحت ومش جايه
وحشتينا ياليالي الحلميه
امانه عليكم متغيروش عبق الروايه
وسيبونا بس نعيش على ذكرى البدايه
متحذفوش الصور الحلوه من جدران عنينا
سيبونا نتصور كِماله من احلام ماضينا
متدمروش المعاني اللي اتحفرت سنين
ولا تحذفوش الصبر اللي بيقويه الحنين
سيبوا معالم الماضي تروح بالسلامه
متخلوناش نندم على انكم رسمتولنا ابتسامه
وحشتنا لياليكي اللي راحت ومش جايه
وحشتينا ياليالي الحلميه
ليست هناك تعليقات:
إرسال تعليق