حكايتي مع القلم

حكايتى مع القلم .
.............

مسكت القلم حسيته بيقولي سبني
اصل انت النهارده مش عاجبني

ليه ياقلمي مالك مش سعيد؟
قالي مش حاسس ف ايدك بطعم العيد
حاسس انك مش عارف تعبر
وعايزني في ايدك ازاي اكتب واسطر

سبني مدفون وسط كراريسك
طالما انت مصمم تخبي احاسيسك
يبقى سبني .. وبلاش مره تتعبني
خليني في يوم العيد
خليني من غيرك وحيد

ليه ياقلمي مالك ياصاحبي
قالي القلم تعبت الحبر جوه قلبي

ومصمم تتوه الاحساس الحلو ف حياتك
وتلخبطه علشان يتوه ف كتر منشوراتك

حتى الكلمه الحلوه والحاجه الحلوه اللي فيك
بتوهها وسط الكلام عشان محدش يحس بيك

وفعلا علمتني درس من الاخر
علمتني في ايدك ابقى شاطر

بس سامحني يا كروان مش قادر
سبني ...... عشان انت مش عاجبني .

ليه ياقلمي ... اول مره تقولي لأ
قالي القلم . كان نفسي اقولك من بدري لأ
كان عندي مليون و١٠٠ الف حق
ده انا حبري منك كان خلاص هيطق
ولع جواي من كتر دقات قلبك لما دق
كان نفسي اقولك لأ .. سبني .

حتي انت ياقلمي ياللي عارف الحكايه
ياللي بتعبري عن احساسي اللي جوايا

حتى انت عايز تفارق وتقول خلاص كفايه

قالي القلم .. ده اللي جواك انا معرفتهوش

حتى انا قلمك خبيته عني ومقولتهوش

ازاي يعني انا عرفته ومكتبتهوش .. سبني .. انت النهارده مش عاجبني .

على باب الوداع

على باب الوداع
*********
دق الفراق على باب قلوبهم
وشمسهم بتتجه ناحية غروبهم
كانت واقفه وبتقوله يعني امشي ؟
قالها كان نفسي اكمل لكن مينفعشي

قالت له حاضر
بس ياريت تبقى فاكر

انك اخترت الرحيل عن دنيتي
 بعد ما حببتني فى البسمه زودت دمعتى

كنت بحلم بيك حبيب وصاحب
همشي بقى ومش عايزه اعاتب
بقى وشي اللي حبيته زمان .دلوقتي مش عاجب

كانت هتمشي والالم بيعصر فيها عصر

وهو واقف بيوهمها ان قد حدود الصبر

ومشيت . وبعد ما مشيت خلاص
حس انه بلا قلب وبلا احساس

جاله صاحبه لقاه حزين مليان ألم
قاله ودعتها ليه لما انت حاسس بالندم

قاله ما انت عارف ياصاحبي الحكايه

قلبي مريض ومستني النهايه

حتى الاطبه قالوا لي خلاص
ومش عايز اتعب معايا اعز الناس

قاله صاحبه يمكن تعيش

قاله .. خلاص ميهمنيش
خليها هى تعيش الحياه بعدي
ليه اتعبها معايا بسنين مرضي

قاله صاحبه .. طيب وانت هتنساها

قاله انساها ... ازاي بس انساها

وعلى وشها .. شوفت البحر والمسافات
وفي ايديها حسيت بحنية اللمسات
حتى كلامها عسل واحلى من الكلام مع غيرها السكات

يعني المحبه بعد منها متلزمناش

ولحن الغنوة اللي اتكتبت لو مش ليها متتغناش

بس فين القلب اللي بقي يقدر يغني
عارف ياصاحبي اخترت لها السعاده بعد مني

اصل السعاده ميقدرش يصنعها قلب بيضعف

ليه اخليها تكمل مع قلبي وفى لحظه موتي هيخطف

قبل ما احب معاها الود والامان
حبيت معاها اني اكون انسان

سكت صاحبه وطال السكوت .
وقاله .. لو سألتك عني اياك تقول بيموت

قولها سعيد فرحان حب تاني ومبسوط

حتى بعد ما اموت .. قولها مبسوط

خليها تفتكر اني فيا كل العبر
علشان تنسى وتفضل زي القمر.
.
.
.
.
.
الخلاصه
ان لم تستطع معها ان تكون انسان ... فعذرا لا تحدثها عن الحب .